ABŞ Prezidenti Donald Tramp Çinin Yeddilik Qrupuna (G7) qoşulmasını “yaxşı fikir" adlandırıb. Tramp bildirib ki, dövləti Çinin G7-yə qoşulmasına etiraz etməyəcək.

Maraqlıdır, Çin bunu qəbul edərmi və edərsə, bu nəyi dəyişəcək?

Mövzu ilə bağlı Sfera.az-a açıqlama verən politoloq Asif Nərimanlı bildirib ki, Çinin G7-yə qoşulma təklifini qəbul etmə ehtimalı çox azdır.

Onun sözlərinə görə, əslində, bu təklif Trampın məqsədindən qaynaqlanır:

“Tramp xüsusən iqtisadi mübarizə apardığı, qlobal müstəvidə əsas rəqib kimi gördüyü Çini nə üçün G7-yə gətirmək niyyətində olması əsas məsələdir. Trampın əsas məqsədi Çini bir növ Amerikanın əsas nəzarətində olan ittifaqın bir parçasına çevirməkdir. Çini həm də bu yolla nəzarətə götürmək istəyir. G7 ölkələrinin proqramında Çinə qarşı mübarizə məsələləri də yer alıb. Bu qədər streteji konsepsiyaların hazırlanmasından sonra Çinin G7-yə qoşulması inandırıcı deyil”.

Politoloqun fikrincə, burada Rusiyaya qarşı verilən bir mesaj da var:

“Rusiya bu platformada yer alıb. Krım işğal olunanda o çıxarıldı. Tramp o addımı səhv hesab edir və Rusiyanı qaytarmaq niyyətindədir. Rusiya isə bu məsələyə elə də isti baxmır. Çünki bu vaxta qədər Rusiya öz iqtisadi və siyasi cəbhəsini formalaşdırıb. Bundan sonra Rusiyanın bu platformaya daxil olması yenidən Qərb ittifaqının bir parçası olmaq deməkdir. Bu da Rusiyanın geosiyasi maraqlarına uyğun gəlmir. Tramp Çini platformaya daxil etməklə Rusiyanı da dönməyə sövq etməyə çalışır. Bu daha çox diplomatik manevrdir”.

Qeyd edək ki, G7 ölkələrinə Böyük Britaniya, Almaniya, İtaliya, Kanada, ABŞ, Fransa və Yaponiya daxildir.

Ən son G7 iclası dünən İran və İsrail arasında baş verən qarşıdurmalara görə Kanadada keçirilib. G7 liderləri tərəfindən hazırlanan və İsrail və İran arasında "gərginliyin azaldılmasına" çağıran birgə bəyanatı imzalamağı düşünmədiyi bildirilib.

Firuzə Əliyeva
Sfera.az

"Tramp Rusiyanı G7-yə daxil etmək istəyir"