Rusiyanın xarici işlər naziri Sergey Lavrov Ermənistana 2 günlük səfərə gedib. Səfər çərçivəsində S.Lavrov Ermənistanın xarici işlər naziri Ararat Mirzoyanla danışıqlar aparacaq. Onun ölkənin Baş naziri Nikol Paşinyan və prezident Vaaqn Xaçaturyanla da görüşəcəyi bildirilir. Qeyd edək ki, S.Lavrov bundan əvvəl İrəvana 2022-ci ilin iyun ayında səfər etmişdi.

Maraqlıdır, Rusiya indiki məqamda Ermənistandan nə istəyir? Ermənistan Qərbyönlü siyasətini davam etdirəcəkmi?

Mövzu ilə bağlı Sfera.az-a açıqlamasında siyasi şərhçi Kənan Novruzov bildirib ki, hazırda çox ciddi proseslər gedir. Belə ki, ard-arda Mirzoyan və Lavrov ciddi açıqlamalar veriblər.

Onun sözlərinə görə, Ermənistan son zamanlar Rusiyaya qarşı mövqeyini yumşaldıb, əvvəlki kimi radikal deyil. Burada üç məqam var:

“Belə ki, ABŞ-Rusiya münasibətlərinin normallaşması Ermənistanı narahat edir. Həmçinin Ermənistan düşünür ki, Rusiya Ukraynadakı müharibədən qalib ayrılacaq, ABŞ-Avropa arasındakı gərginlik də Avropanı zəfilədir və Ermənistan Avropanın ipi ilə quyuya enməli olmadığını yaxşı bilir. Bu hadisələr fonunda Ermənistan “ev”inə qayıdır”.

K.Novruzov qeyd edib ki, Ermənistanın Qərblə münasibətində tarazlığı qoruması çətindir:

“Ermənistanın bundan sonra Qərbyönümlü siyasətini davam etdirməsi çətin olacaq. Digər tərəfdən, Qərbdən tam uzaqlaşa da bilməyəcək çünki 2018-ci ildə Paşinyan hakimiyyətə gələndən bəri Ermənistan ilbəil ciddi şəkildə siyasi, iqtisadi və hərbi baxımdan Qərbdən asılı vəziyyətə düşüb. Birdən-birə bunlardan imtina etsə, bu, Ermənistana baha başa gələcək. Ermənistanın işi getdikcə çətinləşir. Ermənistan hazırda ipin üzərində gəzən kəndirbaz kimidir, balansı qorumağa çalışır. Hələlik bunu bacarır, lakin sonsuz qədər edə bilməsi çətin məsələdir”.

Siyasi şərhçi nəzərə çatdırıb ki, Ermənistan öz mənafeyinə görə Rusiya-Ukrayna müharibəsinin bitməsini istəmir:

“Rusiya-Ukrayna müharibəsi bitəndən sonra ya Rusiya Ermənistanı cəzalandıra bilər: Bu, hərbi müdaxilə və ya Paşinyanın devrilməsi ilə olacaq. Digər variant Rusiya-Ermənistan münasibətlərinin əvvəlki kimi inkişaf etməyə başlamasıdır. Buna görə də Ermənistan Rusiya-Ukrayna müharibəsinin bitməsini istəmir. Bundan sonrakı proseslər isə daha çox Paşinyanın atdığı addımlardan asılıdır”.

Firuzə Əliyeva
Sfera.az

Rusiya elçi göndərib - Paşinyandan nə istənilir?