Dünən İrəvanda keçirilən izdihamlı mitinqdə Erməni Kilsəsinin Tavuş rayonu dyakonluğunun arxiyepiskopu Baqrat Qalstanyan Azərbaycanla sərhəd razılaşması əldə etdiyinə görə Baş nazir Nikol Paşinyanı və onun hökumətini istefa verməyə çağırıb. Bir neçə gün bundan əvvəl bir neçə yüz etirazçı ilə Tavuşdan yürüşə başlayan Qalstanyan mayın 9-da İrəvanın əsas meydanında keçirilən mitinqdə çıxış edib. Həmçinin, bu gün də səhər saat 10:00-dan etibarən Ermənistanda etiraz aksiyaları keçiriləcəyi gözlənilir.

Maraqlıdır, Nikol Paşinyan sözügedən proseslərə necə reaksiya verəcək?

Bununla bağlı Sfera.az-a açıqlama verən siyasi şərhçi Asif Nərimanlı deyib ki, Paşinyanın irəli sürülən “istefa tələbinə” əməl etməyəcəyi bəllidir. Onun sözlərinə görə, Baqratın ətrafına toplaşanlar da Nikolu “taxtından endirmək” potensialından hələki uzaqdır:

“Lakin aksiya uzunmüddətli olarsa, “qartopu” effekti yaratması riskləri də var. Bu baxımdan, Paşinyanın əks həmləsinin iki istiqamətdə olacağı gözləniləndir. O, həm tərəfdarlarını hərəkətə keçirə, “əzələ nümayişi” edə bilər. Bu, təkcə mitinqə qarşı yox, onun arxasındakı qüvvələrə mesaj xarakteri daşıyır. Paşinyan həm də inzibati resursları işə salacaq, yəni aksiyanın böyüməsinin qarşısını müxtəlif yollarla ala, xüsusilə bölgələrdən qatılmaları məhdudlaşdıra bilər. Aksiyanın böyümə tempi nəzarətdən çıxmadığı müddətdə “demokratik” imicini qorumaq və oponentlərinin nəyə “qadir” olduğunu göstərmək məqsədilə birbaşa güc tətbiqindən çəkinəcəyi ehtimalı daha çoxdur”.

Digər ekspert Elxan Şahinoğlu bildirib ki, Ermənistanın Baş naziri Nikol Paşinyan İrəvanda yaxın günlərdə tərəfdarlarının mitinq keçirməsinə qərar verə bilər:

“Bununla Paşinyan hökumət tərəfdarlarının radikalların tərəfdarlarından dəfələrlə çox olduğunu bir daha sübut etmiş olar. Paşinyan bir dəfə bu üsuldan istifadə edib. İstefa şüarlarını yalnız say çoxluğu ilə neytrallaşdırmaq olar. İkinci Qarabağ müharibəsindən sonra radikallar İrəvan küçələrində mitinq və yürüşlərdə istədikləri nəticəni əldə etmədikdən sonra Paşinyan tərəfdarlarının mitinqini keçirdi və say nisbətini ortaya qoydu. Böyük ehtimalla radikalları və kilsəni susdurmaq üçün Ermənistan baş naziri İrəvanın mərkəzi teatr meydanında mitinqə üstünlük verəcək”.

Günay