Veqan əsaslı qidalanma nə dərəcədə faydalıdır?

Son illərdə sağlam həyat tərzi və ətraf mühitin qorunmasına olan marağın artması ilə veqan və bitki əsaslı qidalanma dünya miqyasında sürətlə populyarlaşır.

 

Sfera.az xəbər verir ki, düzgün planlanmış bu pəhriz növü bir sıra sağlamlıq faydaları təqdim etsə də, bəzi riskləri də daşıyır. Araşdırmamız göstərir ki, bitki əsaslı qidalanma ürək-damar sağlamlığı üçün xüsusilə faydalıdır. Liflə zəngin qidalar xolesterol səviyyəsini və qan təzyiqini tənzimləyir, ürək xəstəlikləri riskini azaldır.

 

Həmçinin, bu pəhriz növü çəki idarəsi üçün əlverişlidir, çünki adətən kalori baxımından aşağı, lif baxımından zəngindir. Veqan pəhriz tip 2 diabet riskini də azalda bilər. Lif və antioksidantlarla zəngin qidalar qan şəkərinin stabilləşməsinə və insulin həssaslığının yaxşılaşmasına kömək edir. Həmçinin, bitki əsaslı qidalar həzm sistemini yaxşılaşdırır, dəri sağlamlığını dəstəkləyir və enerji səviyyəsini yüksəldir.

 

Əlavə olaraq, veqan və bitki əsaslı qidalanma ətraf mühitin qorunmasına da töhfə verir. Heyvan mənşəli məhsulların istehlakının azaldılması karbon izi və su sərfiyyatının azalmasına səbəb olur ki, bu da planetin dayanıqlı inkişafına müsbət təsir göstərir. Buna baxmayaraq, bitki əsaslı pəhrizlə bağlı bəzi riskləri də var.

 

Veqan pəhrizdə kifayət qədər protein, B12 vitamini, dəmir, kalsium və omega-3 yağ turşularının çatışmazlığı müşahidə oluna bilər. Bu isə xüsusilə uşaqlar, hamilə qadınlar və yaşlılar üçün problem yarada bilər. Yetərli kalori və qida qəbul edilmədiyi hallarda enerji azlığı, yorğunluq və əzələ kütləsinin azalması kimi problemlər ortaya çıxa bilər.

 

Əzələ kütləsini qorumaq üçün bəzən əlavə protein mənbələri və ya qida əlavələri tələb oluna bilər. Qeyd edək ki, vegan və bitki əsaslı pəhriz yalnız düzgün planlandıqda və vitaminlərlə zəngin olduqda sağlamlıq üçün faydalıdır. Bu, həm fiziki sağlamlıq, həm də ətraf mühitin qorunması baxımından vacib bir addım sayılır.

 

Niyaz Hacıyev

Sfera.az