Üstünə dəmir hasar aşan azyaşlının vəziyyəti ilə bağlı RƏSMİ AÇIQLAMA

Dəmir hasarın üstünə aşması nəticəsində ağır xəsarət alan azyaşlı Kliniki Tibbi Mərkəzdə həyata qaytarılıb.

Sfera.az xəbər verir ki, bu barədə Kliniki Tibbi Mərkəzin İctimaiyyətlə Əlaqələr üzrə mütəxəssisi Aydın Nuri məlumat verib.

“Dəmir hasarın üstünə çıxarkən yıxılan və hasarın üstünə aşması nəticəsində ağır xəsarət alan azyaşlı TƏBİB tabeliyindəki Kliniki Tibbi Mərkəzin Təcili və Təxirəsalınmaz Tibbi Yardım şöbəsinə gətirilib. 4 yaşlı uşaq qarının qapalı travması, qarın boşluğu orqanlarının travması, acı bağırsağın cırılması diaqnozu ilə Kliniki Tibbi Mərkəzin Uşaq cərrahiyyəsi şöbəsinə yerləşdirilib”. 

Aydın Nuri qeyd edib ki, ilkin tibbi yardım göstərildikdən sonra xəstə təcili əməliyyata alınıb:

“KTM-in uşaq cərrahı Binnət Sofuyevin iştirakı ilə baş tutan əməliyyatda cırılmış bağırsağın tikilməsi, qarın boşluğunun təftişi, drenajı prosedurları icra edilib. Əməliyyatdan sonra vəziyyəti stabil olan xəstənin həkim nəzarətində stasionar müalicələri davam etdirilib. Səhhətində müsbət dinamika müşahidə edilib”. 

Ülkər Abdurahmanlı