\"Tez-tez neqativ hallarla qarşılaşırsınızsa, deməli...\" - Mənfi düşüncələrdən necə xilas olaq? + AÇIQLAMA
Düşüncələrin insan həyatına təsir göstərməsi hər kəsi maraqlandıran məsələlərdən biridir. Bir çox insanlar düşüncələrin insan həyatına təsir etmədiyini bildirir. Bir qrup isə bunun əksini iddia edir.
Bəs düşüncələr insan həyatına təsir edirmi?
Mövzu ilə bağlı Sfera.az-a danışan şüuraltı terapist Pərvin Cəfərli bildirib ki, cazibə qanununa görə, kainata mesaj göndərərək istədiklərimizə nail olmaq mümkündür.
"Pozitiv fikirlər stereotipdir. Düşündüyümüz hər şey həyatımızın bir nöqtəsinə təsir edir. Kainatdakı hər şey enerjidən ibarətdir. Hər bir müsbət və mənfi düşüncə kainata yayılır. Cazibə qanununa görə, düşündüyümüz hər şey kainata ötürülür və insanların həyatının axarını dəyişir. Yalnız müsbət deyil, mənfi düşüncələr də kainatla sıx əlaqədə olur. Odur ki, bir insanın başına gələn hər şey onun düşüncəsi ilə bağlıdır. İstifadə etdiyimiz sözlər də düşüncələrimiz qədər təsirlidir. Xüsusən də həyatınızda daima neqativ hallarla qarşılaşırsınızsa, düşüncə baxımından ancaq mənfiyə köklənmisiniz deməkdir. Müsbət düşüncə və xoş niyyət cazibə qanunu ilə həyatınıza müsbət hadisələri cəzb edir. Amma bu zaman inam da çox önəmlidir. İnanmadan müsbət düşünməyin heç bir faydası yoxdur".
Pərvin Cəfərli qeyd edib ki, cazibə qanununa görə, kainat insan enerjisi ilə düz mütənasib işləyir.
“Nə istədiyimizi daima kainata bildirməliyik. Bunu edərkən ürəkdən güvənmək və inanmaq lazımdır. Mənfi düşüncələrdən xilas olmaq üçün meditasiya etmək olduqca vacibdir. Hər gün edilən qısa meditasiyalar ilə şüuraltında olan mənfi enerjilərdən xilas olmaq mümkündür”.
Ülkər Abdurahmanlı
