Son vaxtlarda özünü həyat kouçu kimi təqdim edən insanların sayı artmaqdadır. Bəzi insanlar özlərini fərdi inkişaf mütəxəssisləri adlandıraraq bir sıra xəstəlikləri şüuraltı terapiya ilə müalicə etdiklərini söyləyirlər. Onlar şüuraltını təmizləyərək ağrıları sağaltdıqlarını iddia edirlər. Lakin onların əksəriyyətinin nə tibbi, nə də psixologiya təhsili var.

Bəs son dövrlərdə gündəmə gələn həyat kouçluğu əslində nədir? Xəstəliklər bu üsulla müalicə edilə bilərmi?

Mövzu ilə bağlı Sfera.az-a danışan Kəmalə Hüseynzadə bildirib ki, kouç həyatında nəyisə dəyişmək istəyən hər bir insanın inkişafına köməklik göstərən, onun fərqli mövqeyə gəlməsinə vasitəçilik edən şəxsdir.

“Kouç qarşısındakı şəxsin potensialını maksimum səviyyədə ortaya çıxarıb, onun öz hədəflərinə, arzularına və istəklərinə çatmasına köməklik göstərir. O, həmin insanı narahat edən problemlərin ən optimal şəkildə həllini tapmasına vasitəçilik edir. Bütün ixtisaslar kimi, bu ixtisası da doğru və dolğun mənimsəmək, mükəmməl təhsil almaq ən əsas şərtlərdən biridir. Məhz bu baxımdan bu sahə üzrə ixtisaslaşmış təlim kursları mövcuddur. Bu kurslarda iştirakçılara “Kouçluğun tarixi və fəlsəfəsi”, “Effektiv Ünsiyyət”, “Davamlı Motivasiya” və s öyrədilir".

Kəmalə Hüseynzadə qeyd edib ki, həyat kouçu digər növ terapiyalardan fərqlidir. Həyat kouçları insanların həll yollarını özünün tapmasını istəyir.

“Şüuraltı terapiya isə zehnin rahat olduğu zaman tətbiq edilən hipnotik olmayan bir texnikadır. Onun məqsədi keçmişdə mənfi emosiyaların, düşüncələrin və davranışların yaratdığı və indiki həyata təsir edən psixi, zehni, emosional və fiziki tıxanmaları müəyyən etməkdir. İnsanın imkan verdiyi dərəcədə bu tıxanmaları aradan qaldırmaq mümkündür. Beynimizi qorumaq üçün ağlımız bütün narahatedici məqamları şüuraltına göndərir və hadisəni unutmaq üçün lazımi müdafiə mexanizmini inkişaf etdirir. Ancaq həll olunmadan şüuraltına atılan bu cür məqamlar enerji sahəmizdə təzyiq yaratmağa davam edir və oxşar vəziyyətlər yarandıqda işə salınır. Kouçinq arzu olunan məqsədə və həyatdan məmnunluğa nail olmaq üçün məşqçi ilə insanlar arasında qurulan planlı inkişaf əlaqəsidir. Həyat kouçları ilə yanaşı, karyera kouçu, icraçı kouç və əlaqələr üzrə kouç kimi xidmət göstərən məşqçilər də var”.

Ülkər Abdurahmanlı

Həyat kouçu kimdir və kouçinq nədir? - Şüuraltı terapiyanın sağlamlığımızda rolu