Bu məşhur idman ürək çatışmazlığı əlamətlərini YÜNGÜLLƏŞDİRİR
![Bu məşhur idman ürək çatışmazlığı əlamətlərini YÜNGÜLLƏŞDİRİR](https://sfera.az/photo/orginal/2024/05/13/1715599874_large_59cd2571dd_1524659417.jpg)
Manipal Ali Təhsil Akademiyasının ( Hindistan ) alimləri tənəffüs və istirahət yönümlü yoqa hərəkətlərinin ürək çatışmazlığı əlamətlərini yüngülləşdirə biləcəyini aşkarlayıblar.
Sfera.az xəbər verir ki, tədqiqatın nəticələri Avropa Kardiologiya Cəmiyyətinin (ESC) “Ürək çatışmazlığı 2024” adlı elmi konqresində təqdim edilib.
Tədqiqatda ürək çatışmazlığı olan 85 nəfər iştirak edib. Ürək çatışmazlığı ürəyin normal şəkildə dolub boşalmaması, nəticədə orqanlara qan tədarükünün pozulmasıdır.
İştirakçıların orta yaşı 49 olub, əksəriyyətini isə (82%) kişilər təşkil edib. Alimlər iştirakçıları iki qrupa bölüblər - 45 könüllü nəzarət qrupuna, digər 40 könüllü isə eksperimental qrupa daxil edilib. İkinci qrup altı ay ərzində nəfəsalma və rahatlama hərəkətləri (pranayama yoqa ilə əlaqəli) daxil edilən 50 dəqiqəlik məşqlər edib. Qeyd olunur ki, bütün iştirakçılar tədqiqat boyu ürək çatışmazlığının müalicəsi üçün dərman qəbul etməyə davam ediblər.
Təcrübə başlamazdan əvvəl, altı ay və bir il sonra, tədqiqatçılar exokardioqrafiyadan istifadə edərək eksperimental və nəzarət qruplarında ürəklərin quruluşunu və funksiyasını qiymətləndiriblər. Ölçmələrə ürəyin qanötürmə qabiliyyəti (sol mədəciyin boşalma hissəsi) və sağ mədəciyin funksiyasının qiymətləndirilməsi daxil edilib. Alimlər həmçinin subyektlərin qan təzyiqini, ürək döyüntüsünü, çəkisini və bədən kütlə indeksini qeyd ediblər.
Nəticələr göstərib ki, yoqa ilə məşğul olan iştirakçılar altı ay və bir il ərzində bütün tədbirlər üzrə əsas göstərici ilə müqayisədə əhəmiyyətli irəliləyişlər ortaya qoyublar. Həmçinin ikinci qrupdan olan subyektlər fiziki dözümlülük tələb edən gündəlik işləri (gəzmək, pilləkənlərə qalxmaq) yerinə yetirmək qabiliyyətini artırıblar.
Alimlər qeyd ediblər ki, yoqanın aşkar faydalarına baxmayaraq, ürək çatışmazlığından əziyyət çəkən insanlar dərsə başlamazdan əvvəl həkimə müraciət etməli, daha sonra təcrübəli təlimatçı ilə təlim keçməlidirlər. Tədqiqatçıların fikrincə, köməkçi terapiyanın bu üsulu xəstəliyin yüngül simptomları olan xəstələr üçün uyğunudur.
İnci