Rusiyadan bu ölkələrə SƏRT İSMARIŞ
Kreml NATO hərbçilərinin Ukrayna ərazisinə yerləşdirilməsi ehtimalı ilə bağlı Qərb ölkələrinə sərt mesaj göndərib.
Sfera.az xəbər verir ki, Kremlin sözçüsü Dmitri Peskov Moskvada jurnalistlərə açıqlamasında Avropa ölkələrinin Ukraynaya NATO hərbçiləri yerləşdirmək planlarının Rusiya üçün qəbuledilməz olduğunu bildirib.
Onun sözlərinə görə, Rusiyanın Ukraynada apardığı “xüsusi hərbi əməliyyat”ın əsas məqsədlərindən biri də məhz NATO qüvvələrinin Ukrayna ərazisində yerləşdirilməsinin qarşısını almaqdır.
“Bu, bizim üçün qəbuledilməzdir. Ukrayna ərazisində NATO hərbçilərinin yerləşdirilməsinə imkan
verməmək üçün xüsusi hərbi əməliyyatı həyata keçiririk. Belə addımlara icazə verə bilmərik”, –deyə Peskov vurğulayıb.
Kremlin sözçüsü Böyük Britaniyada yeni baş nazir Endi Börnhemin vəzifəyə başlamasından sonra Moskva-London münasibətlərinin yaxşılaşacağına dair gözləntilərinin olmadığını da bildirib.
“Belə bir ümidimiz yoxdur. Onunla hər hansı təmas planlaşdırılmır”, – deyə o qeyd edib.
Peskov Böyük Britaniyanın Rusiyaya məxsus hərbi gəminin İngiltərənin cənub sahilləri yaxınlığında döyüş sursatı ilə təlim keçməsi barədə açıqlamasına da münasibət bildirib. O, Rusiya Hərbi Dəniz Qüvvələrinin bütün təlimləri beynəlxalq dəniz hüququna uyğun şəkildə keçirdiyini söyləyib.
Bundan başqa, Kremlin sözçüsü Rusiyanın Yeni Dehlidəki diplomatik nümayəndəsinin Hindistan Xarici İşlər Nazirliyinə çağırılması məsələsinə də toxunub. Peskov bildirib ki, Moskva Hindistan tərəfi ilə təmasları davam etdirir və Rusiya Silahlı Qüvvələrinin Kiyev rejiminə silah daşıyan gəmilərə qarşı əməliyyatlar həyata keçirdiyini izah edir.
O, həmçinin Ukraynanın Rusiyanın “Wildberries” elektron ticarət platformasının ordu üçün daşımalar həyata keçirdiyi iddiasını təkzib edib. Peskovun sözlərinə görə, Kiyev mülki obyektlərə hücumlarını davam etdirir və bu, Ukrayna rəhbərliyinin “terrorçu mahiyyətini” nümayiş etdirir. O əlavə edib ki, baş verən hadisələr nəticəsində şirkət və kiçik-orta sahibkarlıq subyektləri zərər görüb, Rusiya hökuməti isə məsələ ilə məşğuldur.
ABŞ Federal Təhqiqat Bürosunun (FBI) direktoru Kaş Patelin Rusiyaya mümkün səfəri ilə bağlı yayılan məlumatlara münasibət bildirən Peskov isə belə bir səfər barədə məlumatı olmadığını deyib.
“Bu cür səfərlər adətən məxfi şəkildə həyata keçirilir. Ona görə də bununla bağlı hər hansı şərh verə bilmərəm”, - deyə Kremlin sözçüsü qeyd edib.
Bəsti Rəfizadə
Sfera.az