Əfqanıstan Pakistanın Kabildəki narkotik reabilitasiya xəstəxanasını bombaladığını və ən azı 400 nəfərin ölümünə səbəb olduğunu açıqlayıb.

Sfera.az bildirir ki, ilkin məlumatlara görə ən azı 400 nəfər həyatını itirib, təxminən 250 nəfər yaralanıb. Hücum nəticəsində xəstəxananın böyük hissələri tamamilə dağılıb.

Əfqanıstan hökumətinin sözçü müavini Həmdullah Fitrət yazılı açıqlamasında:

"Saat 21:00 radələrində Pakistan hərbi rejimi Omid Asılılıq Müalicəsi Xəstəxanasını hədəf alan hava hücumu həyata keçirib”-deyə bildirib.

Zərbə Əfqanıstan və Pakistanın ortaq sərhədləri boyunca atəş açmasından bir neçə saat sonra baş verib. Əfqanıstan hökumətinin sözçüsü Zəbihullah Mücahid zərbəni pisləyərək Pakistanı "xəstəxanaları və mülki obyektləri dəhşətli cinayətlər törətmək üçün hədəfə almaqda" günahlandırıb. O, ölən və yaralananlar arasında xəstəxanadakı xəstələrin də olduğunu iddia edib.

Hadisə yerinə göndərilən yanğınsöndürmə və xilasetmə qrupları yanğını nəzarət altına alıb və dağıntılar altında qalanların xilas edilməsi işləri davam edir.

Əfqanıstan Pakistanın "insanlığa qarşı cinayət törətdiyini" iddia edir, Pakistan rəsmiləri isə Əfqanıstanın bütün ittihamlarını rədd edir.

Pakistan Baş naziri Şehbaz Şərifin sözçüsü Moşarraf Zaidi açıqlamaya tez bir zamanda cavab verib. O, Pakistan qüvvələrinin mülki hədəfləri bombalaması və Kabildəki bir xəstəxanaya edilən hücumla bağlı xəbərlərin əsassız olduğunu vurğulayıb.

Qeyd edək ki, hücum BMT Təhlükəsizlik Şurasının Əfqanıstandakı Taliban liderlərini terrorizmlə mübarizə səylərini dərhal gücləndirməyə çağırmasından bir neçə saat sonra baş verib.

Əvəzində Pakistan hökuməti Əfqanıstanı Pakistan Talibanına, eləcə də təhlükəsizlik qüvvələrinə və mülki şəxslərə hücum edən separatçı qruplara və yaraqlılara təhlükəsiz sığınacaq verməkdə ittiham edir. Kabil isə bunu təkzib edir.

Qeyd etmək lazımdır ki, iki ölkə arasında münasibət fevral ayının sonlarında yenidən şiddətlənib. Əfqanıstan Pakistanın ölkə daxilindəki hava hücumlarına cavab olaraq sərhədyanı hücumlar təşkil etməsi nəticəsində xeyli insan itkisi qeydə alınıb.

Aynil

Əfqanıstanda hava hücumundan ölənlərin sayı 400-ə çatdı