“Qarabağ”ın “Ayaks”a 2:4 hesablı məğlubiyyətinin üzüntüsü böyük olmalı idi. Bu mövsüm Çempionlar Liqasında uğursuzluğu ilə ad çıxaran niderlandlıların Bakıda da Azərbaycan təmsilçisinə təslim olacağı gözlənilirdi. Həm oyunu, həm də nəticələri ilə Qurban Qurbanovun komandasından geri qalan amsterdamlılara haqlı olaraq 3 xal kimi baxırdıq. “Benfika”nı səfərdə udub, cari il yaxşı oyun göstərən “Çelsi”dən xal alan ağdamlılardan gözlənti yüksək olmalı idi də...

Amma əksi oldu. “Ayaks” ÇL-də bu mövsümkü bütün ümidlərini Bakıda doğrultdu, keyfiyyətini Respublika stadionunda ortaya qoydu. Lakin rəqibin səfərdə yağış altında bizi qol yağmuruna tutmasının səbəbi təkcə onların inamlı oyunu deyildi. Həm də baş məşqçi Qurban Qurbanovun səhvlərinin fonunda futbolçularımızın zəif çıxışı idi.

Matça 60-cı dəqiqədə daxil olan və heç cür oyuna qoşula bilməyən Nəriman Axundzadənin tənqid hədəfinə tuş gəlməsinə görə digər oyunçuların zəif performansı gözardı edildi. Diqqəti gənc forvarda yönəldən hər kəs matçda səhvləri ilə yadda qalan başqa oyunçulardan heç danışmadılar. Əslində, start heyətində meydana çıxanlar daha çox günahkar idi...

Qarşılaşmanı zəif keçirənlər siyahısına Elvin Cəfərquliyev, Bəhlul Mustafazadə, Abdullah Zubir, Leandro Andradeni əlavə etmək olar. Xüsusilə E.Cəfərquliyev bu mövsüm Avropa arenasında ən zəif çıxışla yadda qaldı. Elə matçın əvvəlindən onun cinahına yüklənən rəqibin hücumları kəsərli alınırdı.

Təsadüfi deyil ki, matçın gedişində Qurban Qurbanovun köməkçisi Elçin Rəhmanov Elvinə iradlar bildirirdi, eyni səhvlərə təkrar yol verdiyini deyirdi. Əlbəttə, bu halı gördükdən sonra fasilədə Cəfərquliyevin əvəzlənəcəyini gözləmək olardı. Amma Qurbanovun inadkarlığı... 25 yaşlı müdafiəçi matçın sonuna qədər meydanda qaldı. Eyni ssenari isə davam etməkdə idi. Rəqib “Qarabağ”ın sol cinahından hücumlarını effektiv olaraq tamamlamaqla tarazlığı yarada bildi.

Abdullah Zubir isə ötürmələri verməkdə gecikdiyi üçün dəfələrlə tənqid edilib. Amma bu dəfə tamam fərqli mənzərə yaranmışdı. Verdiyi ötürmələrin gecikməsi, qeyri-dəqiqliyi bir yana, lazım olanda zərbə vurmaq əvəzinə yersiz hərəkətləri ilə azarkeşlərin əsəblərini tarıma çəkdi. Hesab 2:1 olarkən fransalı vinger əlinə düşən fürsəti qola çevirsəydi, bəlkə də bu gün rahatlıqla pley-off rəqiblərimizi analiz edirdik. Di gəl ki, Qurbanov daha aktiv olan Kamilo Duranı əvəzləyərək Zubiri meydanda saxlamaqla təəccüb yaratdı, kapitanının xətrinə dəymədi.

Yalnız Leandro Andrade zəif çıxışının qarşılığını alaraq meydanı erkən tərk etdi. Onu isə 6 dəfə ayağına top dəysə də, hamısını rəqibə rahatlıqla qapdıran Nəriman Axundzadə əvəzlədi. 21 yaşlı hücumçu haqlı olaraq tənqid olunur.

Bir dəfə Avropa Liqasının pley-off mərhələsində “Braqa” ilə matçda meydana çıxaraq imdadımıza çatan Axundzadəni Qurban Qurbanov sanki hər dəfə bilərək “tankın altına atır”. Zamanında bir çox oyunçu üzərində bu cür inadkarlıq edən 53 yaşlı mütəxəssisə bu səbəbdən az ziyan dəyməyib.

Şahruddin Məhəmmədəliyev inadkarlığını unutmamışıq. Məhz onun üzərində israr etdiyinə görə vaxtilə ÇL qrupundan kənarda qalan Qurbanov səhvini sonradan anlamışdı.

Əlbəttə, bu gün qazandıqlarımıza görə Qurban Qurbanova böyük təşəkkür düşür. Çempionlar Liqasında pley-off mərhələsinin xəyalını qurmağımıza səbəb olduğu üçün hər zaman təqdirəlayiqdir.

Amma, təcrübəli mütəxəssis elə ötən gün oyundan sonra keçirilən mətbuat konfransında əvəzetmələrlə bağlı suala verdiyi cavabla da qismən səhvlərini etiraf edirdi. Ümid edək ki, növbəti matçlarda daha bir şanlı tarixin yazılmasına şahid olacağıq...

Tək günahkar Nəriman idi?