“Rusiya Ukraynada xarici hərbi bazalar yaradılacağı təqdirdə onları mütləq vuracaq”.

Bunu Rusiya Təhlükəsizlik Şurasının sədr müavini Dmitri Medvedev deyib. O, daha əvvəl nüvə silahının tətbiqi barədə Qərb ölkələrinə xəbərdarlıq etmişdi.

Bununla bağlı Sfera.az-a açıqlama verən siyasi şərhçi Kənan Novruzov deyib ki, Rusiya hələ də özünə güvənir və geri çəkilmək fikrində deyil:

“Medvedevin sosial şəbəkə hesabında yazdıqlarının reallıq dərəcəsi xeyli dərəcədə Qərbin addımlarından asılıdır. Amma Avropa İttifaqı Ukraynada hərbi baza yaradacaqmı? Bunun ağlabatan olduğuna inanmıram. Əsas səbəb odur ki, ABŞ və Aİ-də hələ də Ukrayna ilə bağlı yekdil fikir yoxdur. Ayrı-ayrı Aİ dövlətləri Ukraynaya yardımla bağlı fərqli mövqe ortaya qoyurlar. Bu, rəsmi Kiyevin Aİ-yə üzvlüyü məsələsində də özünü aydın göstərir. Bu isə o deməkdir ki, Aİ-yə üzvlərdən biri və ya bir neçəsinin Ukraynada hərbi bazanın yaradılmasına veto qoyması da mümkündür”.

Müsahibimiz bildirib ki, Avropa indiki məqamda nə Rusiya ilə müharibəyə girmək, nə də Moskavanın əlinə bəhanə vermək istəyir:

“Ona görə də Qərb tələsik addımlar atmayacaq. Yəni, Aİ Ukraynada hərbi baza yaratmayaq. Bu isə o deməkdir ki, Rusiyanın Avropaya müharibə elan etməsi hələ o qədər də real deyil. Bu, yalnız Qərbin müharibəyə birbaşa qoşulacağı təqdirdə olacaq”.

Günay