Xristianların “Halloween” bayramının uşaqlar üçün hansı fəsadları var? - AÇIQLAMA

Hər il olduğu kimi bir neçə gündür, ölkəmizdə də “Halloween” adlı bayram qeyd olunur. Xüsusilə uşaqların, yeniyetmələrin buna marağının olduğu müşahidə edilir. Cəmiyyətdə bizim adətlərə uyğun olmayan bu bayramla bağlı fikirlər isə birmənalıdır. Özəlliklə, qorxu, şiddət formalı görüntülərin insanların psixologiyasına təsiri qınanılır.

Bəs bu cür bayramlar, belə ənənələrin formalaşması uşaqların, yeniyetmələrin psixologiyasına hansı mənfi təsirlər göstərə bilər?

Bununla bağlı Sfera.az-a danışan psixoloq Rövşən Nəcəfov deyib ki, adrenalin yaradacaq əyləncələr hər zaman uşaqlar və yeniyetmələr üçün diqqət çəkir:

“İnsan psixologiyası fərqliliklərə meyillidir. “Halloween” bayramının əsas mahiyyəti qorxunu əyləncəyə çevirməkdir. Bayramın mahiyyətindən kənara çıxanda yanaşma da öz formasını dəyişir.  “Halloween” bayramına əyləncə kimi baxmalıyıq. Əyləncə kimi baxmalı olduğumuz hadisələrə mənfi emosiyalar yükləyirik. İnsanlar qorxularına əylənərək həyəcan verməlidirlər”.

Müsahibimiz düşünür ki, istənilən günün və bayramın mahiyyətini dərk etsək, ona uyğun da davranmış olacağıq:

“Uşaqları və yeniyetmələri dünyada olan müxtəlifliklərlə bağlı maarifləndirmək lazımdır. Uşaqlar və yeniyetmələr qorxaraq həyəcan yaşamamalıdırlar, onların həyəcanları əyləncələrinə bağlı olmalıdır”.

Günay Rəsulqızı