Almaniya ölkə üzrə komendant saatı rejiminə hazırlaşır
Dünya
20:47 / 18.01.2021
5937
Almaniya COVID-19-la mübarizədə indiyə kimi ən sərt karantin rejimini tətbiq etməyə hazırlaşır.
Sfera.az-ın məlumatına görə, yanvarın 19-da Almaniya kansleri Angela Merkel və əyalət baş nazirləri arasında keçiriləcək görüşdə ölkə üzrə komendant saatının tətbiq olunması ilə bağlı qərarın veriləcəyi gözlənilir.
Səbəb isə ilk dəfə İngiltərədəki mutasiyaya uğramış virusun Almaniyada da sürətli bir şəkildə yayılması və ölüm hallarının artmasıdır.
Ölkə üzrə komendant saatı elan olunsa, Almaniyada ictimai nəqliyyatın hərəkət qrafikinə dəyişiklik ediləcək, marketlər və apteklər 3-4 saatlıq iş rejiminə keçəcək, məktəb və uşaq bağçaları bağlanacaq, qida sənayesindən başqa bütün sənaye sahələrində çalışanlar işlərinə bir ay müddətinə fasilə verməli olacaq və ya evdən işləyəcəklər.
Eyni zamanda ölkə üzrə küçəyə çıxma qadağası tətbiq olunacaq.
Buna baxmayaraq, komendant saatının tətbiq olunmasına əyalət baş nazirlərinin çoxu birmənalı fikir bildirməyiblər.
Almaniyada infeksion xəstəlikləri öyrənən Robert Kox İnsitutunun yaydığı məlumata görə, hazırda ölkədə 302 300 aktiv koronavirus xəstəsi var. İndiyə kimi bu xəstəlikdən 46 633 nəfər həyatını itirib, 1 691 700 nəfər isə virusla mübarizədə qalib gəlib.
