Şahzadə Harri ailəsindən 10 gündən çox ayrı qalmır – Səbəbini açıqladı
Böyük Britaniya kral ailəsinin üzvü, Sasseks hersoqu şahzadə Harri Kanadaya köçdükdən sonra depressiya yaşadığını və həmin dövrdə özünü yararsız hiss etdiyini açıqlayıb.
O, anası, şahzadə Diananın ölümündən sonra yaşadığı kədəri uzun illər içində saxladığını və psixoterapiyanın bu hisslərlə mübarizədə ona kömək etdiyini bildirib.
Sfera.az xarici mediaya istinadən xəbər verir ki, 42 yaşlı Harri təhsil platforması "MasterClass" üçün hazırlanan yeni videoda şəxsi həyatından və psixoloji çətinliklərindən danışıb.
Onun sözlərinə görə, kral ailəsindəki vəzifələrindən imtina etməsi və həyat yoldaşı Meqan Marklla bağlı yaranan qalmaqaldan sonra özünü faydasız hiss etməyə başlayıb. Cütlüyün həmin dövrdə köçdüyü Kanadada Harri əvvəllər heç vaxt yaşamadığı güclü emosional tükənmə ilə üzləşib.
“Evdə heç nəyə yaramadığımı hiss edirdim. Təxminən iki həftə depressiyada oldum və adrenalin olmadan fəaliyyət göstərə bilmədiyimi düşünürdüm”, – deyə o bildirib.
Harri kral ailəsindəki həyatının anasının ölümündən sonra yaşadığı kədəri tam şəkildə qəbul etməsinə mane olduğunu da vurğulayıb. Onun sözlərinə görə, rəsmi tədbirlərdə iştirak etmək onda panik ataklara səbəb olurdu. Tədbirlərə hazırlaşarkən köynək və qalstuk geyinməsi belə bəzən boğulma hissi yaradırdı.
Şahzadə qeyd edib ki, kənardan onun dünyanın ən yaxşı imkanlarına sahib olduğu düşünülə bilərdi, lakin bu, anasının itkisi ilə bağlı ağrısını aradan qaldırmırdı.
Harri anasının ölümündən sonra təxminən 20 il ağlamadığını söyləyib. Onun sözlərinə görə, psixoterapiya bu kədərlə üzləşməsinə kömək edib. Terapevtinin Diananın istifadə etdiyi ətri tapmağı məsləhət görməsi isə onda güclü emosional reaksiyaya səbəb olub.
Harri həmin qoxunun uzun müddət içində saxladığı hissləri üzə çıxardığını və onu keçmişə qaytardığını bildirib.
Şahzadə hazırda ailəsi ilə münasibətlərində də müəyyən qaydaya əməl etdiyini deyib. Onun sözlərinə görə, həyat yoldaşı və uşaqlarından ayrı qaldığı müddəti 10 gündən çox etməməyə çalışır. Harri ailəsindən uzun müddət uzaqda qalmamağı həyatında tarazlığı qorumağın əsas yollarından biri hesab edir.
Fatimə
Sfera.az
