“Instagram”-da yeni təhlükə: Hesablar tək bir kliklə əlinizdən çıxa bilər!
Dələduzlar “Meta” platformalarına əsassız müəllif hüququ pozuntusu bildirişləri göndərərək məzmun yaradıcılarının hesablarını müvəqqəti bağlatdırır və şikayəti geri çəkmək müqabilində pul tələb edirlər. Süni intellekt dəstəkli dələduzluq üsulları səbəbindən minlərlə istifadəçi gəlir itkisi ilə üzləşdiyi halda, platformanın təhlükəsizlik alqoritmlərinin yetərsiz qalması sərt etirazlara yol açır.
Sfera.az xəbər verir ki, sosial media platformalarında məzmun istehsal edən istifadəçilər getdikcə böyüyən yeni rəqəmsal şantaj dalğası ilə qarşı-qarşıyadır.
"BBC"nin məlumatına görə, tarixi fotolar paylaşan və 1,5 milyondan çox izləyicisi olan bir “Instagram” istifadəçisi ictimai mülkiyyətdə olan və ya istifadə icazəsi alınmış görsellərə görə saxta müəllif hüququ şikayətlərinin hədəfi olub.
Eyni e-poçt ünvanı üzərindən üst-üstə edilən əsassız müraciətlər nəticəsində hesabı bağlanan istifadəçi ilə əlaqə saxlayan şantajçılar şikayətlərin geri götürülməsi müqabilində "Telegram" üzərindən kriptovalyuta tələb ediblər. Hesabını xilas etmək məqsədilə istənilən fidyəni ödəyən istifadəçi qısa müddət sonra yenidən saxta bildiriş tələləri ilə mağdur edilməyə davam edib.
Məzmun yaradıcıları “Meta”nın saxta müəllif hüququ iddialarını araşdırmaqda yetərsiz qalmasından və etiraz mexanizmlərinin ləng işləməsindən şikayətçidirlər. Yaranan giriş məhdudiyyətləri səbəbindən sponsorluq müqavilələrini itirən bir çox istifadəçi dəstək komandası ilə əlaqə saxlaya bilmək üçün ödənişli doğrulama xidmətlərinə məcbur edildiklərini bildirir.
Sasseks Universitetinin rəqəmsal müəllif hüquqları üzrə mütəxəssisi Andres Quadamuz saxta pozuntu bildirişlərinin keçmişdə "YouTube" və digər veb-saytlarda da tətbiq olunduğunu, lakin inkişaf edən süni intellekt vasitələrinin bu prosesi avtomatlaşdıraraq dələduzluğu daha inandırıcı və kütləvi hala gətirdiyini qeyd edib.
“Meta” tərəfi isə alqoritmlərin sui-istifadələrin qarşısını almaq üçün layihələndirildiyini və qayda pozuntusu təsbit edilən hesablara qarşı əlavə təhlükəsizlik tədbirlərinin tətbiq olunduğunu iddia edib.
Mənsumə
