Səyahət planlayanlara fürsət – Aviabiletlər ucuzlaşa bilər
Noyabr ayında keçirilən “Black Friday” endirimləri səyahət etmək istəyənlər üçün də sərfəli imkanlar yarada bilər. Avropanın bir sıra aviaşirkətləri və hotel şəbəkələri kampaniyaya hazırlaşır. Bu endirimlərdən yararlanmaqla 2027-ci il üçün tətil planlarını daha münasib qiymətə qurmaq mümkün ola bilər.
Sfera.az xəbər verir ki, Avropada “Black Friday” ilə yanaşı, “Cyber Monday” və “Travel Tuesday” kampaniyaları da səyahət bazarında xüsusi təkliflərlə yadda qalır.
Skyscanner platformasının 2025-ci ildə apardığı araşdırmaya əsasən, “Black Friday”dən “Travel Tuesday”yə qədər olan beş günlük dövrdə aviabiletləri almaq üçün ən sərfəli gün “Cyber Monday” olub. Bununla belə, növbəti gün də münasib qiymətə bilet tapmaq mümkün olub.
Skyscanner-in səyahət üzrə eksperti Laura Lindsi bildirib ki, kampaniyaların sonuna yaxın aviaşirkətlər və hotellər müştəriləri cəlb etmək üçün əlavə təkliflər irəli sürə bilərlər.
Hansı aviaşirkətlər endirim edəcək?
Avropanın bir sıra iri aviaşirkətləri 2026-cı il “Black Friday” kampaniyaları üçün xüsusi səhifələr hazırlayıb. Bunlara “easyJet”, “British Airways”, “Iberia”, “SAS”, “Jet2”, “Finnair”, “Air Europa” və “LOT Polish Airlines” daxildir.
Ötən il isə “Ryanair”, “Lufthansa”, “Turkish Airlines”, “Pegasus Airlines”, “Norwegian” və digər daşıyıcılar da endirim kampaniyaları keçiriblər. Lakin bu şirkətlərin hamısının builki kampaniyada iştirak edəcəyi və hansı qiymətləri təklif edəcəyi hələ dəqiqləşməyib.
“Marriott”, “Accor”, “IHG” və “Hilton” kimi böyük hotel şəbəkələri də ötən il “Black Friday” endirimləri təqdim ediblər.
Sərfəli bilet almaq üçün nə etmək lazımdır?
Səyahət planlaşdıranlara qiymət dəyişiklikləri barədə bildirişləri aktivləşdirmək, müxtəlif tarixlər üzrə biletləri müqayisə etmək və alternativ hava limanlarını nəzərdən keçirmək tövsiyə olunur.
Skyscanner və Google Flights kimi platformalar qiymətləri izləməyə imkan verir. Aviaşirkətlərin elektron poçt bildirişlərinə abunə olmaq da kampaniyaların başlandığı vaxtdan xəbər tutmağa kömək edə bilər.
Bununla yanaşı, endirim elan edilməsi biletin mütləq daha ucuz olması demək deyil. Buna görə kampaniyadan əvvəlki qiymətlərlə müqayisə aparmaq, baqaj və digər əlavə xidmətlərin ödənişlərini, həmçinin bileti dəyişdirmək və ya geri qaytarmaq şərtlərini yoxlamaq vacibdir.
Beləliklə, “Black Friday” endirimləri 2027-ci il üçün səyahət planlaşdıranlara qənaət etmək imkanı yarada bilər. Ən sərfəli təklifi tapmaq üçün isə qiymətləri bir neçə platformada müqayisə etmək və kampaniyanın şərtlərini diqqətlə oxumaq lazımdır.
Fatimə
Sfera.az
