“Apple” “Nvidia”-nı geridə qoyaraq dünyanın ən dəyərli şirkəti oldu
“Apple” şirkəti “Nvidia”nı geridə qoyaraq dünyanın ən dəyərli şirkəti titulunu yenidən geri alıb.
Sfera.az xəbər verir ki, bu barədə İngiltərənin “The Guardian” nəşri məlumat yayıb.
Süni intellekt bazarında yaşanan dalğalanmalar və qlobal iqtisadi qeyri-müəyyənliklər bir sıra texnologiya şirkətlərinin səhmlərinə təsir göstərib. “Nvidia”nın səhmlərindəki enişdən isə “Apple” faydalanaraq bazar dəyərini qoruyub və yenidən qlobal bazarın zirvəsinə yüksəlib.
“Nvidia” daha əvvəl süni intellekt çiplərinə yüksək tələbat sayəsində bazar dəyərində tarixi göstəricilərə çataraq rəqiblərini geridə qoyub. Lakin son dəyişikliklər bu üstünlüyün uzunmüddətli olmaya biləcəyini göstərib.
“Apple”ın “Siri”yə gətirdiyi genişmiqyaslı yeniliklər və süni intellekt sahəsində atdığı strateji addımlar da investorların şirkətə marağını artırıb. Ekspertlər hesab edir ki, artıq investorlar yalnız çip istehsalçılarına deyil, süni intellekt ekosistemində fəaliyyət göstərən digər texnologiya şirkətlərinə də diqqət yetirirlər.
Süni intellektə artan qlobal maraq yarımkeçirici sektorunda yaddaş istehsalçıları da daxil olmaqla müxtəlif şirkətlərin mövqeyini gücləndirir. Buna baxmayaraq, süni intellekt infrastrukturuna yatırımlar texnologiya bazarının əsas hərəkətverici qüvvələrindən biri olaraq qalır.
Mənsumə