iPhone 18 Pro Max-in qiymətinin əhəmiyyətli dərəcədə artacağı gözlənilir
Apple-ın gələcək flaqman smartfonu iPhone 18 Pro Max güclü texniki xüsusiyyətləri ilə yanaşı, yüksək qiyməti ilə də diqqət çəkə bilər.
Sfera.az xəbər verir ki, Analitiklərin fikrincə, yaddaş çiplərinin bahalaşması və 2 nanometrlik prosessora keçid cihazın istehsal xərclərini əhəmiyyətli dərəcədə artıracaq.
Counterpoint Research şirkətinin hesabatına görə, iPhone 18 Pro Max satışa çıxmamışdan əvvəl ciddi xərc təzyiqi ilə üzləşib. Bu səbəbdən Apple-ın qiymət siyasətinə yenidən baxacağı ehtimal olunur. Xüsusilə 1 TB yaddaşa malik modelin qiymətində nəzərəçarpacaq artım gözlənilir.
Məlumata əsasən, iPhone 18 Pro Max-in komponentlərinin dəyəri iPhone 17 Pro Max ilə müqayisədə təxminən 300 dollar daha yüksək ola bilər. Bunun əsas səbəblərindən biri NAND yaddaş çiplərinin qiymətinin 250 dolları keçməsinin proqnozlaşdırılmasıdır.
Analitiklər bildirirlər ki, süni intellekt məlumat mərkəzlərinə artan tələbat qlobal yaddaş çipi qıtlığına səbəb olub. Bunun nəticəsində həm NAND, həm də DRAM yaddaşlarının qiymətləri sürətlə yüksəlir.
İstehsal xərclərinin artmasına təsir edən digər mühüm amil isə Apple-ın TSMC tərəfindən istehsal olunan 2 nanometrlik A20 Pro prosessoruna keçididir. Yeni istehsal texnologiyasının ilkin mərhələlərində məhsuldarlığın aşağı olması hər bir çipin istehsal xərcini daha da artırır.
Hazırda Apple şirkəti iPhone 18 seriyasının qiymətləri ilə bağlı rəsmi məlumat açıqlamayıb. Lakin analitiklər yeni Pro Max modelinin əvvəlki nəsillə müqayisədə daha bahalı olacağını istisna etmirlər.
Altay