Ev heyvanı saxlamaq stressi artırır – SORĞU
Ev heyvanı saxlamaq insanlara stresslə mübarizədə kömək etsə də, gündəlik qayğı, maliyyə xərcləri və heyvanı tək qoymaqla bağlı narahatlıq onlarda əlavə psixoloji gərginlik yaradır.
Sfera.az xəbər verir ki, heyvan sahiblərinin bir qismi heyvanlarını tək qoymaq və onlara kifayət qədər vaxt ayırmamaqla bağlı narahatlıq yaşayır.
Bununla yanaşı, sağlamlıq problemləri, baytarlıq xərcləri və ev heyvanını itirmək qorxusu sahiblər üçün ciddi emosional yük yaradır.
ABŞ-də keçirilən sorğuya əsasən, ev heyvanı sahiblərinin 47 faizi heyvanlarını evdə tək qoyarkən ayrılıq narahatlığı yaşadığını deyib. Respondentlərin 41 faizi isə ev heyvanlarını tək qoymamaq üçün sosial tədbirlərdən imtina etdiyini qeyd edib.
Sorğuda iştirak edənlərin 70 faizi heyvanları ilə daha çox vaxt keçirmək üçün uzaqdan işləməyə üstünlük verdiyini bildirib. Tualet təlimi, gündəlik qulluq və baytarlıq xərcləri də sahiblərin üzləşdiyi əsas stress amilləri sırasındadır.
Mütəxəssislər söyləyir ki, ev heyvanının ölümü də sahibində ciddi kədər və emosional sarsıntı yarada bilər. Bəzi hallarda bu itkinin təsiri yaxın insanın itirilməsi ilə müqayisə ediləcək qədər güclü olur.
Bununla belə, ekspertlər ev heyvanı ilə keçirilən vaxtın günahkarlıq hissi ilə deyil, daha şüurlu və keyfiyyətli şəkildə dəyərləndirilməsinin həm insan, həm də heyvan üçün daha faydalı olduğunu vurğulayırlar.
İradə Elsevər
