“iOS 27” nə vaxt çıxacaq?
“Apple” WWDC 2026 tədbirində “iOS 27” əməliyyat sistemini rəsmi şəkildə təqdim edib. Tədbirdən dərhal sonra tərtibatçılar üçün ilk beta versiyası istifadəyə verilib. Şirkətin əvvəlki illərdə tətbiq etdiyi buraxılış cədvəlinə əsasən, “iOS 27”-nin yekun versiyasının 2026-cı ilin sentyabr ayında bütün istifadəçilər üçün yayımlanacağı gözlənilir.
Sfera.az xəbər verir ki, yeni əməliyyat sistemi əsasən “Apple”Intelligence süni intellekt platformasına yönəlib. Ən diqqətçəkən yenilik isə Siri səsli köməkçisinin tamamilə yenilənməsidir. Yenilənmiş Siri istifadəçilərlə daha təbii dialoq qura, əvvəlki söhbətlərin məzmununu yadda saxlaya və fotoşəkillər, elektron məktublar, qeydlər kimi şəxsi məlumatlar arasında daha ağıllı axtarış edə biləcək. Bundan əlavə, Siri Mesajlar, Mail, Təqvim, Musiqi və digər tətbiqlərdə bir neçə əməliyyatı ardıcıl şəkildə yerinə yetirmək imkanına sahib olacaq.
“iOS 27” performans baxımından da mühüm yeniliklər vəd edir. “Apple”bildirir ki, tətbiqlərin açılma sürəti artacaq, AirDrop vasitəsilə fayl ötürülməsi daha sürətli həyata keçiriləcək. Fotoşəkillər tətbiqinə süni intellekt dəstəyi ilə şəkillərin redaktəsini asanlaşdıran yeni alətlər əlavə olunacaq. Safari brauzeri açıq vərəqləri avtomatik qruplaşdıracaq, yenilənmiş Liquid Glass dizaynı isə istifadəçilərə interfeysin görünüşünü daha rahat fərdiləşdirmək imkanı verəcək.
“Apple”-ın açıqladığı siyahıya əsasən, “iOS 27” yeniləməsi “iPhone 11” seriyası və ondan sonrakı bütün modellərə, həmçinin “iPhone SE” (3-cü nəsil) cihazına təqdim olunacaq.
Mənsumə
