Dünyanın ən böyük hörümçək toru TAPILDI
Yunanıstan və Albaniya sərhədində yerləşən kükürd mağarasında elm dünyasını heyrətləndirən bir kəşf edilib.
Sfera.az xəbər verir ki, tədqiqatçılar 100 kvadratmetrdən çox sahəni əhatə edən nəhəng hörümçək toru aşkarlayıblar. Daha maraqlısı isə odur ki, bu torun içərisində 111 minə yaxın hörümçək yaşayır. İki fərqli növün birlikdə yaşadığı bu nəhəng koloniya, hörümçəklərin davranışı haqqında yeni məlumatlar ortaya qoyub.
Macarıstanın Sapientia Universitetindən tədqiqatçı İştvan Urakın rəhbərlik etdiyi qrup müəyyən edib ki, mağaranın divarları demək olar ki, tamamilə torlarla örtülüb. Araşdırmalar göstərib ki, bu nəhəng tor 69 min “tövlə tuneli hörümçəyi” və 42 min “vərəq torlu hörümçək” tərəfindən yaradılıb.
Adətən bir-birindən uzaq yaşayan bu iki növün mağaranın unikal şəraiti sayəsində ortaq koloniya yaratdığı müəyyən edilib. Genetik analizlər isə göstərib ki, bu hörümçəklər səthdə yaşayan qohumlarından fərqlənərək yeraltı mühitə tam uyğunlaşıblar. Başqa sözlə, Kükürd Mağarasındakı bu icma özünəməxsus, təcrid olunmuş bir ekosistem formalaşdırıb.
Kükürd mağarası bir-biri ilə əlaqəli yeraltı kameraların mürəkkəb sistemindən ibarətdir.
Bu nəhəng tor 2022-ci ildə həvəskar mağaraçılar tərəfindən kəşf edilib və daha sonra alimlər tərəfindən tədqiq olunub. Mağaranın divarlarını bürüyən ipək torlar həm ölçüləri, həm də içərisində yaşayan çoxsaylı hörümçəklərlə diqqət çəkir.
Bu mühitdə həyat səth ekosistemlərindən fərqlənir. Günəş işığının çatmadığı mağarada həyat kükürdlə qidalanan mikroorqanizmlərlə başlayır. Həmin mikroorqanizmlər isə öz növbəsində hörümçəklər üçün qida mənbəyinə çevrilir. Beləcə, mağarada tamamilə özünəməxsus bir ekosistem formalaşıb.
Bu çoxqatlı quruluş indiyədək qeydə alınan ən böyük hörümçək koloniyası kimi elm tarixində yer alıb.
Aynil
