“Süni intellekt məni yuxusuz qoyur”- “OpenAI”nin rəhbəri

“OpenAI”nin baş direktoru Sam Altman, süni intellektin pis niyyətli şəxslər tərəfindən istifadə edilməsinin ciddi dələduzluq riskləri yaratdığını bildirib. O, xüsusilə səsli identifikasiya üsullarının artıq təhlükəsiz olmadığını və bu məsələnin onu gecələr yuxusuz saxladığını deyib.

Sfera.az xarici mediaya istinadən xəbər verir ki, Altman bu açıqlamanı ABŞ Federal Ehtiyat Sisteminin süni intellektin iqtisadi təsirlərinə dair tədbirində verib.

Onun sözlərinə görə, AI ilə yaradılan saxta səslər maliyyə sistemlərini ciddi təhlükə altına alır. Altman əlavə edib:

“Gələcəkdə səsli fırıldaqları əvəzləyəcək gerçəyə bənzər videolarla qarşılaşacağıq və biz buna hələ hazır deyilik”.

“OpenAI”nin yaydığı hesabatda isə “ChatGPT”nin artıq 500 milyon istifadəçiyə çatdığı, ABŞ-də istifadəçilərin 20%-nin bu platformadan öyrənmə və bacarıq inkişafı üçün faydalandığı qeyd olunub.

Şirkət yaxın aylarda iqtisadçılar Cason Furman və Mixael Strain ilə əmək bazarına təsirləri araşdırmaq üçün yeni layihəyə başlayacaq. Bu araşdırma “OpenAI”nin 2026-cı ildə Vaşinqtonda açacağı ofisdən idarə olunacaq.

Bəsti Rəfizadə
Sfera.az