Fil marketə basqın etdi: Ərzaq məhsullarını yedi - FOTOLAR

Taylandın Nakhon Ratçasima əyalətində nadir hadisə baş verib. Bir böyük fil marketə daxil olaraq ərzaqları yeyib.

Sfera.az xarici mediaya istinadən xəbər verir ki, “Plai Biang Lek” adlı vəhşi fil, ərzaq axtarışı zamanı marketə girərək təxminən 10 dəqiqə ərzində rəflərdəki düyünü və toyuq yumurtalarını yeyib.

Təhlükəsizlik kameralarının görüntülərində nəhəng filin mağazada çətinliklə hərəkət etdiyi və ərzaqları böyük iştahla yediyi görünür.

Market sahibi Ploy hadisə zamanı fili qovmağa çalışdığını bildirib. Onun sözlərinə görə, fillər bölgədən tez-tez keçsə də, ilk dəfə idi ki, onlardan biri birbaşa mağazaya girərək ərzaqlara hücum edib. 

Milli park rəsmiləri və yerli sakinlər tərəfindən tanınan “Plai Biang Lek” adlı filin illərdir həmin ərazidə yaşadığı bildirilir. Lakin bu, onun ilk dəfə bir dükana girərək ərzaq axtardığı hadisə kimi qeydə alınıb.

Taylandda 3 min – 3 min 500 arası vəhşi filin yaşadığı təxmin edilir. Fillər bəzən tarlalara və evlərin həyətlərinə girsələr də, bir filin təkbaşına, gündüz saatlarında yaşayış məntəqəsinə daxil olaraq birbaşa marketə girməsi bölgədə nadir rastlanan hal kimi qiymətləndirilir.

Bəsti Rəfizadə
Sfera.az