İspaniyada aparılan arxeoloji qazıntılar zamanı alimləri təəccübləndirən nadir bir tapıntı üzə çıxıb. Segoviya şəhəri yaxınlığındakı San Lazaro adlı qaya sığınacağında üzərində qırmızı nöqtə olan qədim bir çınqıl daşında 43 min il yaşı olan insan barmaq izi aşkar edilib. Araşdırmalar göstərib ki, bu iz çox güman ki, yetkin bir Neandertal kişisinə aiddir.

Sfera.az xarici mediaya istinadən xəbər verir ki, məlumata görə, daş ilkin baxışda sadə görünsə də, onun funksional istifadəsi olmadığı və üzərində qəribə qırmızı bir işarə daşıdığı müşahidə olunub.

Məhkəmə-tibb ekspertlərinin və multispektral görüntüləmə texnologiyasının köməyi ilə aparılan təhlillər nəticəsində qırmızı nöqtənin içərisində insan barmaq izinə uyğun gələn izlər aşkarlanıb.

Madrid Complutense Universitetinin tarixdən əvvəlki dövrlər üzrə professoru Maria de Andres Herrero qeyd edib ki, bu tapıntı Neandertalların yalnız sağ qalmaq üçün deyil, həm də simvolik ifadə qabiliyyətinə malik olduqlarını sübut edir:

“Daşı ilk dəfə gördükdə onun üz cizgilərini xatırlatdığını düşündük. Belə bir izə rast gələcəyimizi gözləmirdik”.

Daşın yaşı radiokarbon analiz yolu ilə müəyyən olunub və təxminən 43 min il əvvələ aid olduğu təsdiqlənib. Tədqiqatçılar daşın bir vaxtlar çay yatağında yerləşdiyini və bilərəkdən qaya sığınacağına gətirildiyini ehtimal edirlər.

Madrid Məhkəmə Tibb Laboratoriyasının ekspertlərinin bildirdiyinə görə, bu barmaq izi nəinki bu günə qədər tapılmış ən qədim insan barmaq izi ola bilər, həm də piqmentlə (boya maddəsi ilə) əlaqəli ilk izlərdən biri kimi tarixə düşür.

Durham Universitetinin paleolit arxeologiya üzrə professoru Paul Petit isə qeyd edib:

“Barmaq izinin məhz insan toxunuşu nəticəsində meydana gəldiyinin məhkəmə-tibbi yollarla sübuta yetirilməsi bu tapıntının əhəmiyyətini daha da artırır”.
Yeni kəşf Neandertalların müasir insanlarla düşündüyümüzdən daha çox ortaq xüsusiyyətlərə malik olduğunu göstərən elmi dəlillərə yeni töhfə verib.

Bəsti Rəfizadə
Sfera.az

Neandertalın barmaq izi tapıldı – FOTO