"SpaceX" şirkəti “Fram2” missiyası çərçivəsində Yer kürəsinin qütb orbitinə ilk insanlı uçuşunu uğurla tamamlayıb. Missiyadan əldə edilən ilk görüntülər ictimaiyyətə təqdim edilib.

Sfera.az "NTV"yə istinadən xəbər verir ki, 31 mart tarixində start verilən missiya çərçivəsində "Crew Dragon Resilience" kapsulu Yer kürəsinin ən ucqar nöqtələrinin üzərinə göndərilib.

Dörd astronavtın iştirak etdiyi bu tarixi uçuşda, ekipaj üzvləri qütb bölgələrinin unikal mənzərələrini qeydə alaraq dünya ilə bölüşüblər.

"SpaceX" uçuş zamanı kapsulun pəncərəsindən qeydə alınan və qütb bölgələrinin qarla örtülü mənzərələrini əks etdirən bir video yayımlayıb. Şirkət bu görüntüləri “Dragon kapsulundan Yer kürəsinin qütb bölgələrinin ilk görüntüləri” adlandırıb.

Missiyanın komandiri kripto-milyarder Çun Vanq, norveçli kinoqraf Cannik Mikkelsen, avstraliyalı qütb tədqiqatçısı Erik Filips və alman robotika üzrə mütəxəssis Rabea Roggenin daxil olduğu "Dragon" kapsulu "Falcon-9" raketi ilə Florida ştatındakı Kennedi Kosmik Mərkəzindən buraxılıb.

Buraxılış yerli vaxtla 21:46-da baş tutub. "Falcon-9" raketinin ilk mərhələsi, yenidən istifadə oluna bilən texnologiya sayəsində Atlantik okeanında yerləşən “A Shortfall of Gravitas” adlı pilotsuz platformaya uğurla eniş edib.

Astronavtlar bu müddət ərzində uzunmüddətli kosmik missiyalar üçün insan sağlamlığı və performansına dair 22 elmi təcrübə aparacaq. Missiyanın dəqiq başa çatma tarixi hələ müəyyən olunmasa da, ekipajın Cənubi Kaliforniya sahillərində, Sakit okeana eniş edəcəyi açıqlanıb.

Bəsti Rəfizadə

"SpaceX"dən tarixi missiya: Qütb orbitinə ilk insanlı uçuş - FOTO