4 bürcü çətin günlər gözləyir
Oktyabrın sonunda baş verəcək bədirlənmiş Ayın bəzi bürclər üçün emosional gərginlik, münasibətlərdə dəyişikliklər və mühüm qərarlarla müşayiət olunacağı iddia edilir. Astroloji proqnoza görə, xüsusilə Buğa, Şir, Əqrəb və Dolça bürclərinin nümayəndələri həyatlarında ciddi dəyişikliklərlə üzləşə bilərlər.
Sfera.az xəbər verir ki, bu barədə UNIAN nəşri astroloq Olqa Babiçin proqnozuna istinadən məlumat yayıb.
Astroloqun sözlərinə görə, oktyabrın bədirlənmiş Ayı oktyabrın 26-da Kiyev vaxtı ilə saat 05:11-də müşahidə olunacaq. Onun təsirinin oktyabrın 25-dən 27-dək daha güclü hiss ediləcəyi iddia edilir. Bu dövrün emosional gərginliklə yanaşı, uzun müddətdir təxirə salınan qərarların verilməsinə də təkan yarada biləcəyi bildirilir.
Dəyişikliklər və gözlənilməz qərarlar
Astroloji şərhə əsasən, bədirlənmiş Ay Buğa bürcündə, Günəş isə Əqrəbdə olacaq. Proqnozda Plutonun bu astroloji düzülüşdə iştirakının gizli məlumatların üzə çıxması, ictimai açıqlamalar və kəskin dəyişikliklərlə əlaqələndirildiyi qeyd olunur.
Mütəxəssis hesab edir ki, bu günlərdə insanlar münasibətlərini və iş həyatlarını yenidən nəzərdən keçirə bilərlər. Uzun müddətdir narazı olduqları vəziyyətdən çıxmaq istəyənlər üçün dəyişiklik etmək fürsəti yarana bilər.
Bununla belə, emosional vəziyyətdə verilən yeni qərarların sonradan yanlış hesab edilə biləcəyi də vurğulanır.
Astroloq mübahisələrdən, tələsik addımlardan və emosional təsir altında maliyyə öhdəlikləri götürməkdən çəkinməyi tövsiyə edir. Həmçinin yolda diqqətli olmaq, şübhəli internet keçidlərinə daxil olmamaq və bank hesablarının təhlükəsizliyini yoxlamaq məsləhət görülür.
Ən çox hansı bürclər təsirlənəcək?
Proqnoza görə, Buğa, Şir, Əqrəb və Dolça bürclərinin ilk ongünlüyündə doğulanlar daha ciddi dəyişikliklərlə qarşılaşa bilərlər. Buğa bürcündə münasibətlər, sağlamlıq və maliyyə məsələləri, Şirlərdə isə ailə, ev və işlə bağlı qərarlar ön plana çıxa bilər.
Əqrəblər üçün münasibətlər və tərəfdaşlıq sahəsində gərginlik ehtimalı vurğulanır. Dolçaların isə ailə münasibətləri, valideynlərlə ünsiyyət və həyatlarının müəyyən mərhələsini başa vurmaqla bağlı məsələlərə diqqət yetirəcəkləri bildirilir.
Astroloqun fikrincə, Qız, Balıqlar, Oğlaq və Xərçəng bürclərinin ilk ongünlüyündə doğulanlar üçün isə müsbət imkanlar yarana bilər. Hətta əvvəlcə mənfi görünən hadisələrin sonradan yaxşı nəticələrə gətirib çıxaracağı iddia edilir./demokrat
