Avropa Şurası Parlament Assambleyasının (AŞPA) Bərabərlik və qeyri-diskriminasiya Komitəsinin iyulun 10-da onlayn formatda növbəti iclası keçirilib.

Sfera.az xəbər verir ki, toplantıda "Böhran və pandemiya dövründə insan haqlarının qorunması: gender bərabərliyi və ayrıseçkilik”, "Süni intellektdən istifadənin yaratdığı ayrıseçkiliyin qarşısının alınması” kimi aktual məsələlərlə bağlı mühazirələr dinlənilib. Onlayn toplantıda ölkəmizi təmsil edən millət vəkili, Azərbaycanın AŞPA-dakı nümayəndə heyətinin üzvü Könül Nurullayeva çıxış edərək, süni intellektlə (Sİ) bağlı fikirlərini bölüşüb. İlkin hesabata istinad edən millət vəkili süni intellektin yaşam tərzimizi dəyişdirməsi fikri ilə razılaşdığını, eyni zamamda Sİ-in bir çox müsbət tərəflərinin olduğunu vurğulayıb. Onun sözlərinə görə, Sİ irq və ya gender əsasında ədalətsiz ayrıseçkiliyi aşkarlamağa kömək edir, eyni zamanda Sİ xəstələrin ümumi sağlamlıq vəziyyətini yoxlamaq və təhlükəli xəstəlikləri qabaqcadan təyin etmək üçün səhiyyə sektorunda tətbiq edilə bilər. Bununla yanaşı, Sİ təmiz, faktiki olaraq sonsuz bir nüvə istilik enerjisini inkişaf etdirmək səylərini sürətləndirir.

K.Nurullayeva müsbət keyfiyyətlərlə yanaşı, Sİ-nin inkişafı və tətbiqi ilə əlaqədar yaranan risklərə də toxunub. Qeyd edib ki, qərəz və ayrı-seçkilik süni intellekt vasitəsilə yayıla bilər, çünki mövcud ayrı-seçkiliyə qarşı qanunlarla texnologiyanın yeni imkanları arasında boşluqlar var. Bu boşluq mədəni geriləmə adlanır. "Mövcud ayrı-seçkiliyə qarşı qanunlar qərarın nəticələrinin ədalətliliyinin ifrat qiymətləndirilməsinə gətirib çıxara bilər” deyən millət vəkili süni intellektlə bağlı bəzi qabaqlayıcı tədbirlərə də toxunub. K.Nurullayeva qabaqlayıcı tədbirləri belə qruplaşdırıb: "Statistik qərəzləri azaltmağa kömək edən ayrı-seçkilik əleyhinə əlavə tədbirlərin daxil edilməsi,
ayrı-seçkiliyi azaltmaq məqsədilə təşkilat üzvləri üçün davranış qaydalarının təkmilləşdirilməsi,
ayrı-seçkilik etməmə haqqında qanun və məlumatların qorunması haqqında qanunun ayrı-seçkilik etməmək hüququnu qoruya biləcək əsas hüquqi sənədlər kimi qəbul edilməsi”.

K.Nurullayeva Azərbaycanın süni intellektə münasibətini və bu sahədə ölkəmizin təcrübəsini də diqqətə çatdırıb: "Azərbaycanın bir çox sahələrdə süni intellekt tətbiq etmək məqsədi var. Süni intellekt yaxın gələcəkdə daha çox enerji sənayesi, təhsil, ədliyyə, nəqliyyat və insan hüquqları sektorunda tətbiq ediləcək” deyən K.Nurullayevanın qənaətincə, alqoritmlər gələcəkdə qərar qəbul edən şəxslərdən daha yaxşı nəticələr verə bilər.