Süni intellekt bahalaşma yaradacaq
Süni intellekt texnologiyalarının sürətli inkişafı dünya üzrə elektrik enerjisinə tələbatı əhəmiyyətli dərəcədə artırır. Məlumat mərkəzlərinin enerji istehlakının yaxın illərdə iki dəfə yüksələcəyi proqnozlaşdırılır. Bu isə elektrik şəbəkələrinin genişləndirilməsini və milyardlarla dollarlıq yeni investisiyaları zəruri edə bilər.
Sfera.az xəbər verir ki, bu barədə Beynəlxalq Enerji Agentliyinin (BEA) proqnozuna istinadən CNBC məlumat yayıb.
Proqnoza əsasən, məlumat mərkəzlərinin illik elektrik enerjisi istehlakı 2030-cu ilədək təxminən 1000 teravatt-saata çatacaq. Bu məqsədlə 2035-ci ilədək 26 milyon kilometr yeni elektrik ötürücü xəttin çəkilməsi, mövcud xətlərin isə təxminən 16 milyon kilometrinin dəyişdirilməsi və ya modernləşdirilməsi nəzərdə tutulur.
Agentliyin hesablamalarına görə, növbəti onillikdə elektrik şəbəkələrinə çəkilən xərclər 75 faiz artacaq.
Bu artımın əsas səbəbi süni intellekt sistemlərinin geniş yayılması və onların fəaliyyətini təmin edən məlumat mərkəzlərinin sayının çoxalmasıdır. Proqnozlaşdırılır ki, 2026-cı ildə dünyanın ən böyük məlumat mərkəzi operatorları yeni infrastrukturun qurulmasına 700 milyard dollardan çox vəsait xərcləyəcəklər.
Məlumata görə, 2025-ci ildə məlumat mərkəzlərinin elektrik istehlakı 17 faiz artıb. Müqayisə üçün, həmin dövrdə dünya üzrə elektrik enerjisinə ümumi tələbatın artımı cəmi 3 faiz təşkil edib. 2035-ci ilədək isə qlobal elektrik enerjisi tələbatının 40-50 faiz yüksələcəyi gözlənilir.
Qeyd edək ki, elektrik enerjisinə tələbatın artması fonunda bəzi ölkələrdə tariflərin yüksəlməsi də gündəmə gəlir. Belə ki, 2027-ci ilin yanvarında Böyük Britaniyada elektrik enerjisinin qiymətinin 26 faiz artaraq illik 2166 funt sterlinqə çatacağı proqnozlaşdırılır.
Beləliklə, süni intellektin inkişafı təkcə texnologiya sektorunu deyil, enerji infrastrukturunu da dəyişdirir. Məlumat mərkəzlərinin artan enerji ehtiyacı gələcəkdə elektrik təchizatı və tariflər məsələsini daha da aktuallaşdıra bilər.
İnci
Sfera.az






