Göyçayda narçılığın inkişaf perspektivləri müzakirə olundu - FOTO
Göyçayda 150-dən çox fermer və sahibkarın iştirakı ilə narçılığın inkişafı, ixrac imkanlarının genişləndirilməsi və aqrar subsidiya mexanizmləri müzakirə edilib.
Sfera.az xəbər verir ki, sentyabrın 9-da Göyçay rayon Heydər Əliyev Mərkəzində “Narçılığın İnkişaf Perspektivləri və Yeni Çağırışlar” mövzusunda geniş tərkibli görüş keçirilib.
Kənd Təsərrüfatı Nazirliyinin dəstəyi və Azərbaycan Nar İstehsalçıları və İxracatçıları Assosiasiyasının (ANİİA) təşkilatçılığı ilə baş tutan tədbir Assosiasiyanın 10 illiyinə həsr olunub.
Görüşdə Mərkəzi Aran, Mil-Muğan, Şirvan iqtisadi rayonları və ətraf bölgələrdən 150-dən çox fermer, istehsalçı, emalçı, sahibkar və Assosiasiya üzvü iştirak edib. Narçılığın inkişafına və Assosiasiyanın fəaliyyətinə dəstək göstərən bir sıra şəxslər “Azərbaycan Narı” döş nişanı ilə təltif olunublar.
Tədbirdə Kənd Təsərrüfatı Nazirliyinin aidiyyəti strukturlarının nümayəndələri ilə narçılığın mövcud vəziyyəti və inkişaf perspektivləri ətrafında fikir mübadiləsi aparılıb. Fermerlərin qarşılaşdıqları çətinliklər, ixrac imkanlarının və ixrac coğrafiyasının genişləndirilməsi, yeni Dövlət Proqramı və aqrar subsidiya mexanizmləri müzakirə edilib.
Görüşdə, həmçinin Qarabağda iri narçılıq təsərrüfatlarının yaradılmasına başlayan şirkətlərin nümayəndələri də iştirak ediblər.
Tədbirin dövlət və özəl sektor arasında əməkdaşlığın gücləndirilməsi, narçılıq sahəsində mövcud problemlərin müzakirəsi və inkişaf imkanlarının müəyyənləşdirilməsi baxımından əhəmiyyət daşıdığı bildirilib.
İradə Elsevər
