Azərbaycanda adətən zənginlik və iri maliyyə dövriyyəsi kişilərlə assosiasiya olunur. Lakin son illərin məlumatları göstərir ki, ölkədə milyonlarla manat dəyərində sərvətə malik olan qadınlar da mövcuddur və onların bəziləri bank, sığorta, eləcə də iri sənaye strukturlarında nəzərəçarpacaq paylara sahibdirlər.

Sfera.az Azərbaycanın ən varlı qadınlarının kimliyi, sərvəti necə qazanmaları və fəaliyyət sahələri haqqında araşdırma aparıb.

Araşdırma göstərir ki, Azərbaycan iqtisadiyyatında qadınların sərvət qazandığı əsas sahələrdən biri bank sektorudur. Bir neçə qadın ölkədəki iri bankların əsas səhmdarları sırasında yer alır.

Nigar Mehdiyeva — “Bank BTB”də lider qadın

“Bank BTB”nin 74.9%-lik payı ilə ikinci yerdə gələn Nigar Mehdiyeva da maliyyə sektorunun tanınmış simalarındandır. Onun aktivlərinin dəyəri 49.8 milyon manat civarında qiymətləndirilir.

Yeganə Şirinova və “Günay” markası

“Günay Bank” və “Günya Sığorta” şirkətlərində əsas səhmdarlardan biri olan Yeganə Şirinovanın sərvəti 31.2 milyon manat civarındadır. O, bu sahədə illərlə davam edən fəaliyyəti ilə möhkəm yer tutub.

Qeyd edək ki, “Günay Bank”ın lisenziyası Azərbaycan Mərkəzi Bankı tərəfindən 16 may 2023-cü il tarixində ləğv olunub. Bankın bağlanmasına səbəb kimi onun öhdəliklərini yerinə yetirə bilməməsi, maliyyə sabitliyinin pozulması və qanunvericiliyə zidd fəaliyyət göstərməsi göstərilmişdi.

Yeganə Şirinova isə bu bankın və onunla bağlı “Günya Sığorta” şirkətinin əsas səhmdarlarından biri idi. Lakin bankın ləğvindən sonra onun aktivlərinin durumu ilə bağlı rəsmi açıqlama verilməyib. Bu səbəbdən onun sərvətinin hazırkı həcmi qeyri-müəyyəndir və əvvəlki məlumatlar yalnız tarixi kontekst üçün istifadə edilə bilər.

Validə Abbasova — “Rabitəbank” səhmdarı

“Rabitəbank”da 30% paya sahib olan Validə Abbasova təxminən 30.4 milyon manat sərvətə malikdir. O, həm də bank idarəçiliyində mühüm söz sahiblərindən sayılır.

Bank sektorunda yüksək paylara sahib digər qadınlar da var:

   •   Vəfa Vəliyeva — “Muğanbank”da 11.5 milyon manatlıq paya malik olub. Bank indi fəaliyyət göstərmir.
   •   Fəridə Mehdiyeva — Eyni bankda 10.8 milyon manatlıq aktivə sahib idi.
   •   Dilarə Nuruyeva — “Rabitəbank” səhmdarı, sərvəti 9.2 milyon manatdır.
   •   Məlahət və Cəmilə Əsgərova — “İpək Yolu” sığorta şirkətindəki payları ilə hər biri təxminən 5.7 milyon manatlıq sərvətə sahibdir. Onlar həmçinin Zərifə Həmzəyevanın qızlarıdır.
   •   Nəzakət İsmayılova — “Meqa Sığorta” şirkətinin səhmdarı kimi 4.4 milyon manatlıq aktivə sahibdir.

Qeyd edək ki, 2025-ci ilin əvvəlinə qədər Azərbaycanın ən zəngin qadını Zərifə Həmzəyeva idi.

O, “Premium Bank”ın 84,5%-lik səhmlərinə sahib idi və onun aktivlərinin dəyəri təxminən 130 milyon manat qiymətləndirilirdi. O, eyni zamanda məşhur “Gazelli Group” kosmetika şirkətinin təsisçisi olub. Həmzəyeva təkcə bank sektorunda deyil, istehsal və kosmetikada da önəmli biznes layihələrə imza atmışdı.

Onu da bildirək ki, “Premium Bank” 1993-cü ildə “AZAL Bank” adı ilə yaradılıb. 2008-ci ildə adı dəyişdirilərək “Silk Vey Bank” olub. 2018-ci ildə bankın adı yenidən dəyişdirilib və “Premium Bank” adlandırılıb. Bankın əsas səhmdarı olan Zərifə Həmzəyeva “Azərbaycan Hava Yolları”(AZAL) Qapalı Səhmdar Cəmiyyətinin keçmiş prezidenti Cahangir Əsgərovun həyat yoldaşı idi.

Həmzəyeva 2025-ci ilin yanvar ayında dünyasını dəyişib.

Bəsti Rəfizadə
Sfera.az

Azərbaycanın milyonçu qadınları: Onlar kimdir?