Nazirlər Kabineti sabit tariflə bağlı öhdəlik götürməlidir - Natiq Cəfərli

Xəbər verdiyimiz kimi, “Elektroenergetika haqqında” Qanun layihəsində dəyişiklik qüvvəyə minib. Beləliklə, bundan sonra elektrik enerjisi ilə əlaqədar sabit aylıq tarif tətbiq ediləcək.

Sfera.az bildirir ki, iqtisadçı-ekspert Natiq Cəfərli elektrik enerjisi ilə bağlı yeni qərarı şərh edib. 

Ekspert bildirib ki, artıq qanun təsdiqlənib və sabit aylıq tarifin tətbiqi nəzərdə tutulur:

“Bu məsələ ilə bağlı qərarvermə səlahiyyəti isə Tarif Şurasına (TŞ) verilib. İlkin ehtimal odur ki, sabit aylıq tarif 1 manat olacaq. Yəni, vətəndaşlar istifadə etdikləri elektrik enerjisinin dəyərinə əlavə olaraq hər ay 1 manat da ödəməli olacaqlar”.

N.Cəfərli vurğulayıb ki, bu tarifin sonradan artırılmayacağına heç kim zəmanət verə bilməz:

“Çox güman ki, TŞ-nin ilk qərarı 1 manat olacaq, amma kim əminliklə deyə bilər ki, bir neçə aydan sonra TŞ gecənin bir vaxtında bu tarifi artırmayacaq? Bu səbəbdən, məsuliyyət konkret ünvanlandırılmalıdır”.

Ekspert hesab edir ki, Nazirlər Kabineti sabit aylıq tarifin ən azı üç il müddətinə dəyişməz qalacağı ilə bağlı öhdəlik də götürməlidir.

Firuzə Əliyeva
Sfera.az