Avropa və ABŞ razılaşacaqlar - Ticarət gərginliyi aradan qalxacaq

Avropa İttifaqı (Aİ) Komissiyası ABŞ ilə tariflər mövzusunda intensiv danışıqların davam etdiyini və tərəflər arasında razılaşmanın əldə olunmasının mümkün olduğunu açıqlayıb.

Sfera.az xəbər verir ki, komissiyanın sözçüsü Olof Qill Brüsseldə keçirilən gündəlik mətbuat konfransında bildirib ki, Aİ və ABŞ texniki və siyasi səviyyədə intensiv şəkildə danışıqlar aparır:

"Məqsədimiz ABŞ ilə razılaşdırılmış nəticəyə nail olmaqdır. Belə bir razılaşmanın əldə edilməsi əlçatan görünür. Aİ ilə ABŞ arasında razılaşma əldə olunmaması halında İttifaq, 93 milyard avro dəyərindəki ABŞ məhsullarına qarşı tədbirlər tətbiq etməyə hazırlaşır. Bu məqsədlə, əvvəllər hazırlanmış 21 milyard və 72 milyard avroluq iki cavab tədbiri paketi bir siyahıda birləşdirilib və bu tədbirlərin 7 avqustdan etibarən mərhələli şəkildə qüvvəyə minməsi planlaşdırılır".

Qeyd edək ki, Ai-yə üzv ölkələri ticarət məsələlərində Avropa Komissiyası təmsil edir və hazırda ABŞ rəsmiləri ilə tariflərlə bağlı müzakirələr aparılır.

ABŞ Prezidenti Donald Tramp isə bu həftəki açıqlamasında Yaponiya ilə ticarət razılaşmasının tamamlandığını, Yaponiyanın ABŞ-yə 15% gömrük vergisi ödəyəcəyini bildirib. Tramp, Aİ-yə ünvanladığı məktubda isə 1 avqustdan etibarən İttifaq ölkələrindən ABŞ-yə göndərilən bütün məhsullara sektoral tariflərdən əlavə 30% gömrük vergisi tətbiq olunacağını bəyan edib.

Ekspertlər bu açıqlamalardan sonra Vaşinqtonla Brüssel arasında da oxşar bir razılaşmanın əldə ediləcəyi ehtimalının gücləndiyini bildirirlər.

Bəsti Rəfizadə
Sfera.az