Yay aylarında Bakı metrosundan istifadə edən sərnişinlərdə narazılıq yaradan hallardan biri də kondisionersiz köhnə vaqonların xəttə buraxılmasıdır. Köhnə vaqonlarla yanaşıyeni model vaqonlarda da kondisionerlərin işləməsində fasilələr müşahidə edilir. Yeni vaqonlarda kondisioner sistemi olsa da bəzi hallarda kondisionerlərin işləmədiyi, sadəcə havalandırmanın olduğu görünür.

Sfera.az məsələ ilə bağlı "Bakı Metropoliteni" QSC-yə sorğu ünvanladı.

Ünvanladığımız sorğuya cavab olaraq qurumdan bildirilib ki, köhnə vaqonların xəttə olmasının əsas səbəbi həmin vaqonların istismar müddətinin hələ başa çatmamasıdır.

Qurumdan verilən məlumata görə, hazırda metropolitenin sərəncamında olan qatarların istismar müddəti 30-31 il təşkil edir və bu müddət vaqonların istehsalçıları tərəfindən müəyyənləşdirilir. Məhz bu səbəbdən mikroiqlim (kondisioner) sistemi olmayan vaqonlar hələ də xəttə buraxılır.

Məlumatda qeyd olunur ki, köhnə vaqonların yenilənməsi davamlı prosesdir:

"2025–2030-cu illəri əhatə edən dövlət proqramına əsasən, artıq istismar müddəti bitmiş vaqonların mərhələli şəkildə istismardan çıxarılması və onların yeni nəsil, kondisionerli vaqonlarla əvəz olunması nəzərdə tutulub. Bu çərçivədə 300-dək yeni vaqonun alınması planlaşdırılır".

Metropoliten bildirir ki, texniki baxış və təmir müddəti istisna olmaqla, kondisionerli vaqonlar hazırda əsasən Yaşıl xətt üzrə xidmət göstərir və bu qatarlar texniki normativlərə uyğun şəkildə xəttə buraxılır:

“Sərnişin məmnuniyyətini artırmaq məqsədilə son dövrlərdə bəzi yeniliklər də tətbiq olunub. İlk dəfə olaraq son 16 ildə metrodakı qatarların intervalında azalma müşahidə edilib. Qatar cütlərinin sayı 30-dan 32-yə qaldırılıb və pik saatlarda interval 1 dəqiqə 52 saniyəyə endirilib. Bundan əlavə, qatarların hərəkətinin təşkilində əvvəlki kağız əsaslı qrafikdən imtina edilərək rəqəmsal proqram təminatı istifadəyə verilib”.

Bakı Metropoliteni bildirir ki, sərnişinlərin rahatlığının və təhlükəsizliyinin təmin edilməsi üçün texnoloji modernləşmə, eləcə də insan resurslarının inkişafı istiqamətində işlər davam etdirilir.

Bəsti Rəfizadə
Sfera.az

Bakı metrosunda kondisioner problemi: Yayda sərnişinlər əziyyət çəkir