Azərbaycanda ipoteka kreditləri üzrə borcalanların əksəriyyətini dövlət sektorunda çalışan şəxslər təşkil edir.

Sfera.az xəbər verir ki, bu barədə İpoteka və Kredit Zəmanət Fondunun statistikasında bildirilib.

İlin birinci rübündə ipoteka krediti alanların 30,708 nəfəri dövlət sektorunda, 23,077 nəfəri isə özəl sektorda çalışıb. Faiz nisbəti ilə əsaslandırsaq ipoteka kreditlərinə müraciət edənlərin 57%-nin dövlət sektorunda, 43%-nin isə özəl sektorda işlədiyi məlum olur.

Güzəştli şərtlərlə borclananlar arasında hərbi qulluqçular üstünlük təşkil edir

İpoteka kreditləri üzrə güzəştli kateqoriyaya daxil olan borcalanlar arasında ən böyük payı hərbi qulluqçular təşkil edir. Onların sayı 8,913 nəfərə çatır. Bu, ümumi güzəştli borcalanların yarısından çoxu (51.29%) deməkdir. Digər güzəştli kateqoriyalar üzrə borcalanların kateqoriyalar üzrə bölgüsü aşağıdakı kimidir:

Dövlət qulluqçuları – 2,949 nəfər (16.97%)

Daxili işlər orqanlarında xüsusi rütbəli şəxslər – 1,855 nəfər (10.68%)

Müəllimlər – 1,754 nəfər (10.09%)

Elmlər doktoru və ya namizədləri – 447 nəfər (2.57%)

Məcburi köçkünlər – 1,183 nəfər (6.81%)

Şəhid ailələri – 83 nəfər (0.48%)

İdmançılar – 174 nəfər (1%)

Milli qəhrəman və ya Vətən müharibəsi qəhrəmanları – 11 nəfər (0.06%)

Jurnalistlər – 7 nəfər (0.04%)

Əsas yaş qrupu isə 30-35 yaş arasıdır

Borcalanların yaş qruplarına görə bölgüsünə gəlincə, ipoteka götürən 18,270 nəfər 30–35 yaş arası, 17,798 nəfər 35 yaşdan yuxarı, 17,717 nəfər isə 18–29 yaş arasında olub.

Borcalanların böyük əksəriyyəti kişilərdir

Fondun statistikasına görə, ipoteka kreditləri üzrə müraciət edənlərin əksəriyyəti kişilərdir. Beləliklə, borcalanların 79% kişilər, yalnız 21%-i qadınlardır.

Azərbaycanda ən çox kimlər ipoteka krediti götürür?