"Temu" və "Shein" qiymətləri artırır - Tarix açıqlandı
ABŞ-nin Çin məhsullarına tətbiq etdiyi yüksək gömrük rüsumları e-ticarət sektoruna təsir etməyə başlayıb. Çinin məşhur onlayn alış-veriş platformaları "Temu" və "Shein" ABŞ-də satdıqları məhsulların qiymətlərini artıracaqlarını açıqlayıblar.
Sfera.az xəbər verirki, şirkətlər qiymətlərdəki artım faizini açıqlamasa da qərarın 25 aprel tarixindən etibarən qüvvəyə minəcəyi bildirilib. Hər iki platformanın eyni vaxtda oxşar açıqlama yayması diqqət çəkib.
Məlumatda qeyd olunur ki, ABŞ-nin gömrük tarifləri səbəbilə əməliyyat xərcləri ciddi şəkildə artıb və bu da qiymətlərin yüksəlməsinə səbəb olub.
Ekspertlər isə bildirirlər ki, ABŞ-nin tətbiq etdiyi gömrük rüsumları, eyni zamanda 800 dollar altındakı məhsullara verilən gömrük azadolmasının 2 maydan etibarən ləğv olunması, ölkədə ucuz Çin məhsullarına çıxışı çətinləşdirəcək. Elektrikli avtomobil və inyektor kimi bəzi məhsullara tətbiq olunan vergi isə %245-ə çatıb.
Hazırda Çindən ABŞ-yə gündəlik təxminən 4 milyon ədəd aşağı dəyərli bağlamanın daxil olduğu bildirilir. Yeni gömrük qaydalarının bu rəqəmlərə də təsir edəcəyi gözlənilir.
Bəsti Rəfizadə
