Çin ABŞ neftindən imtina etdi - Kanada ilə böyük razılaşma imzalandı
Çin ilə ABŞ arasında davam edən ticarət müharibəsi enerji sahəsin də öz təsirini göstərməyə başlayıb. Pekin rəhbərliyi ABŞ-dən neft idxalını kəskin şəkildə azaldaraq, diqqətini Kanadaya yönəldib.
Sfera.az "En Son Haber"ə istinadən xəbər verir ki, Çin ABŞ-dən neft idxalını təxminən 90 faiz azaldıb və əvəzində Kanadadan rekord həcmdə xam neft idxal etməyə başlayıb.
Bu addım, Pekinin ABŞ-nin enerji sektorundan asılılığını azaltmaq strategiyasının tərkib hissəsi kimi qiymətləndirilir.
Qərbi Kanadada istifadəyə verilən yeni boru kəmərinin genişlənməsi, Çinin emal zavodlarının Kanadanın sıx və ucuz xam neftinə çıxışını asanlaşdırıb. Bu da Pekinin Kanada ilə neft ticarətini sürətlə artırmasına şərait yaradıb.
Rəqəmlər də bunu təsdiqləyir. 2025-ci ilin mart ayında Vankuver yaxınlığındakı terminaldan Çinə ixrac olunan neft həcmi 7,3 milyon barelə çataraq rekord göstəriciyə imza atıb. Aprel ayında isə bu göstəricinin daha da artacağı proqnozlaşdırılır.
Eyni dövrdə, Çinin ABŞ-dən neft idxalı ciddi şəkildə azalıb. İyun ayında 29 milyon barel olan idxal həcmi son aylarda 3 milyon barelə qədər geriləyib.
Mütəxəssislər bu addımı Çin və ABŞ arasında davam edən ticarət gərginliyinin enerji sahəsinə birbaşa təsiri kimi qiymətləndirirlər. ABŞ rəhbərliyi tərəfindən tətbiq edilən yüksək gömrük rüsumlarına qarşı Pekinin bu strateji cavabı, iki ölkə arasında münasibətlərin daha da gərginləşəcəyinin siqnalı kimi dəyərləndirilir.
Bəsti Rəfizadə
