ABŞ-də aparılan yeni sorğu nəticələri Prezident Donald Trampın iqtisadi siyasətlərinə və inflyasiya ilə mübarizə tədbirlərinə ictimai dəstəyin azaldığını göstərib. Ekspertlər bu azalmanı Trampın xüsusilə Çin başda olmaqla bir sıra ölkələrə qarşı tətbiq etdiyi yüksək gömrük tarifləri və “ticarət müharibəsi” siyasəti ilə əlaqələndirirlər.

Sfera.az xəbər verir ki, "CBS News" və "USA Today"in yayımladığı sorğunun nəticələrinə görə, Trampın iqtisadi siyasətini dəstəkləyənlərin sayı 44 faiz, inflyasiya ilə mübarizəsinə dəstək verənlərin sayı isə 40 faiz olub.

Bu, mart ayının sonundakı göstəricilərlə müqayisədə 4 faiz bəndi azalma deməkdir.

Ümumilikdə Trampa olan dəstək də aşağı düşüb. Belə ki, onun ümumi dəstək reytinqi mart ayında 50 faiz, fevralda isə 53 faiz olduğu halda, aprel ayında bu rəqəm 47 faizə düşüb.

Sorğu iştirakçılarının siyasi mənsubiyyətinə görə Trampın tarif siyasətinə münasibəti fərqlidir. Respublikaçıların 91 faizi Trampın siyasətini dəstəklədiyini bildirsə də, müstəqil seçicilər arasında bu göstərici 43 faiz, demokratlar arasında isə cəmi 16 faiz olub. İştirakçıların 58 faizi ümumiyyətlə, idxal mallarına əlavə tariflərin tətbiqinə qarşı olduqlarını bəyan ediblər.

Qeyd edək ki, sorğu 8-11 aprel tarixlərində keçirilib. 9 aprel tarixində isə Tramp bəyan edib ki, “qarşılıqlı tarifləri” 90 gün müddətinə təxirə salacaq və Çin istisna olmaqla, digər ölkələrə tətbiq edilən tariflər 10 faizə endiriləcək. Hazırda ABŞ Çindən gətirilən məhsullara 145 faiz, Çin isə ABŞ məhsullarına 125 faiz tarif tətbiq edir. Tramp, əlavə olaraq ağıllı telefonlar, kompüterlər və digər elektron məhsulların hələlik tariflərdən azad olacağını bildirib.

Sorğu iştirakçılarının 51 faizi tariflərin məqsədini düzgün hesab etsə də, Trampın bu məsələyə yanaşmasına yalnız 37 faiz dəstək verib. 59 faiz ABŞ iqtisadiyyatının vəziyyətini “pis” və ya “çox pis” kimi dəyərləndirib, 53 faiz isə vəziyyətin daha da pisləşdiyini bildirib.

Bəsti Rəfizadə

Amerikalılar Trampın iqtisadi siyasətini qiymətləndirib - Sorğu