Azərbaycanın ən çox mal aldığı ölkələr siyahısında Çin ilk sıraya yüksəlib.

Sfera.az statistik məlumatlara istinadən xəbər verir ki, əvvəlki illərdə Azərbaycan ən çox malı Rusiyadan aldığı halda 2024-cü ildə liderlik Çinə keçib.

Ötən il Rusiyadan 3,62 milyard dollar dəyərində mal idxal edilib. Həmin ildə Çindən alınan məhsulların dəyəri isə 3,72 milyard dolları ötüb.

2024-cü ildə Azərbaycana gətirilən hər 100 dollarlıq malın 17,7 dolları Çin malı olub.

İdxaldakı dəyişiklikdən görünür ki, növbəti illərdə Çindən idxal edilən malların dəyəri bir qədər də artacaq. Yalnız son 3 ildə Çindən idxalın dəyəri 1,7 milyard dollara yaxın artıb ki, bu da olduqca böyük artım miqdarıdır.

Bəs Azərbaycan Çindən daha çox nə alır?

Qeyd edək ki, Çin dünyada ən çox mal satan ölkədir. Çinin ixracının çox olmasının səbəbi ölkədə istehsalın tam şaxələnməsi, yəni bütün növ malların istehsal edilməsidir. Buna görə də Çindən Azərbaycana ixracda da çeşidlilik müşahidə olunur. Azərbaycan Çindən həm ərzaq, həm də qeyri-ərzaq növlərinə aid əksər məhsullardan alır.

Buna baxmayaraq, Çindən ölkəmizə daha çox avtomobillər, smartfonlar, müxtəlif növ kompüterlər və avtomobil ehtiyat hissələri idxal edilir.

Statistik məlumatlara əsasən, 2024-cü ildə Çindən idxalda daha çox pul avtomobil alışına xərclənib. Bir ildə Çindən alınan avtomobillərə ayrılan pul 515 milyon dollar olub.

Çindən smartfon telefon alışına da xeyli vəsait xərclənir. Bir ildə Azərbaycan Çindən smartfon alışına 337 milyon dollar ayırıb.

Sıralamada üçüncü yerdə avtomobil ehtiyat hissələri qərarlaşıb. Avtomobil ehtiyat hissələrinin idxalına 116 milyon dollar xərclənib.

Çindən kompüter və onların ehtiyat hissələrinin alınması da böyük vəsait tələb edib. Bir ildə noutbuklara görə 72,36 milyon dollar, kompüter və onların ehtiyat hissələrinə görə daha 86,8 milyon dollar xərclənib.

Vasif

Azərbaycan ən çox bu ölkədən mal alır – Rusiyadan idxal azalıb