Son bir ildə Azərbaycanda bəzi ərzaq məhsullarının qiymətində nəzərəçarpacaq artım qeydə alınıb.

Sfera.az Dövlət Statistika Komitəsinin qiymət müayinəsinə istinadən xəbər verir ki, qiyməti daha çox artan əsas ərzaq məhsullarından qoyun ətinin, limonun, zeytun yağının, şabalıdın, fındığın, bananın, almanın, xiyarın, pomidorun, şirin bibərin, sarımsağın adını çəkmək olar.

Son bir ildə qoyun ətinin qiyməti 12 faizdən çox artıb. 2023-cü ilin avqustunda qoyun əti bazarında orta qiymət 15,2 manat olduğu halda, bu ilin avqustunda 17,1 manatı ötüb. Zeytun yağının da dəyərində nəzərəçarpan artım var. Bir il əvvəl qiyməti 15,7 manat olan zeytun yağı hazırda 17,3 manatdan baha satılır.

Daha çox qiymət artımı müşahidə edilən meyvələrdən limonun qiyməti 13 faiz artaraq 3,8 manata, şabalıdın qiyməti 15,1 faiz artaraq 10,8 manata, fındığın qiyməti 8 faiz artaraq 5,8 manata, bananın qiyməti 9 faiz artaraq 2,9 manata, almanın qiyməti 6 faiz artaraq 1,9 manata çatıb.

Xiyarın və pomidorun dəyərində daha çox artım baş verib. Xiyarın dəyəri orta hesabla 85 faiz artaraq 1,2 manat, pomidorun qiyməti 52 faiz artaraq 1,4 manat olub.

Şirin bibərin də dəyəri xeyli artıb. Bu tərəvəz məhsulu 19 faiz bahalaşaraq 1,5 manat olub. Sarımsağın qiyməti isə 10 faiz artaraq 3,8 manat təşkil edib.

Vasif