Dollar ucuzlaşır, qızıl sürətlə bahalaşır - Yeni böhran gözlənilirmi?
Son 10 gündə ABŞ dollarının məzənnəsində enmə müşahidə edilir.
Sfera.az xəbər verir ki, dolların qlobal məzənnə dəyərini ifadə edən Dollar İndeksi iyulun 27-dən sonra enişə keçib. Həmin tarixdə 105,6 olan indeks avqustun 2-də 104 səviyyəsinə, dünən isə 102 həddinə düşüb. Bu gün isə indeks bir qədər yüksələrək 102,7-yə çatsa da əvvəlki günlərlə müqayisədə xeyli aşağıdır.
Dollarının ucuzlaşmasının ilkin səbəbi ABŞ mərkəzi bankının faizləri sabit saxlaması idi. Son günlər isə yayılan bir xəbər maliyyə bazarlarında narahatçılıq yaratdığından dollar bir qədər də ucuzlaşıb. İddialara görə, ABŞ iqtisadiyyatında vəziyyət yaxşı deyil və yenidən maliyyə böhranın olma ehtimalı var. Bu iddialarla əlaqədar maliyyə bazarlarında satışlar artıb və bununla əlaqədar olaraq dollar ucuzlaşıb.
Yaranmış gərginliyi azaltmaq üçün ABŞ mərkəzi bankı açıqlama verib. Açıqlamada qeyd edilir ki, maliyyə böhranı ehtimalı gözlənilmir və müşahidə edilən durğunluq qısa müddətdə aradan qalxacaq.
Qeyd edək ki, maliyyə bazarlarında narahatçılığın yaranması qızılın dəyərini bir qədər də yüksəldib. Avqustun ilk günlərində bir troya unsiya (31,1 qram) qızılın qiyməti 2500 dolları ötmüşdü. Bu qiymət səviyyəsi bütün dövrlərin ən yüksək səviyyəsidir. Hazırda qızılın qiyməti 2443 dollara düşsə də yenə də qiymət çox yüksəkdir.
Vasif