“Xərclərin 60-65 faizi ərzağın alınmasına gedir, bu, yoxsulluq göstəricisidir” - Ekspert
Azərbaycan əhalisinin ərzaq məhsullarının alınmasına sərf etdiyi vəsaitin payı çoxdur. Ölkəmizin pərakəndə ticarətində ərzağa xərclənən pulun payı qabaqcıl ölkələrlə müqayisədə bir neçə dəfə yüksəkdir.
Sfera.az xəbər verir ki, bunu iqtisadçı-ekspert Natiq Cəfərli bildirib.
N.Cəfərli xatırladıb ki, 2024-cü ilin ilk 4 ayında pərakəndə ticarət şəbəkəsində 17 milyard manat dəyərində mal satılıb.
“Bunun 9,6 milyard manatı ərzaq məhsulları, içkilər və tütün məmulatları, 7,4 milyard manatı isə qeyri-ərzaq mallarının alınmasına sərf edilib”, - deyən ekspert söyləyib ki, içkilər və tütün məmulatlarını nəzərə almasaq, ilk 4 ayda ərzaq məhsullarının alınmasına 8 milyard 693 milyon manat xərclənib.
Bu dövrdə alıcıların xərclədiyi vəsaitin 51,2%-nin ərzaq məhsullarının alınmasına ayrıldığını bildirən N.Cəfərli bunun olduqca yüksək göstərici olduğunu vurğulayıb. Onun məlumatına görə, qabaqcıl ölkələrdə belə yüksək göstəriciyə rast gəlinmir: “Əhali xərclədiyi hər 100 manatın 51 manat 20 qəpiyini ancaq ərzağın alınmasına ayırıb. Bu, əsl yoxsulluq göstəricisidir. İnkişaf etmiş ölkələrdə pərakəndə ticarət xərclərinin 20%-dən çoxunu ancaq qidalanmağa ödəyən insan artıq yoxsul sayılır. Çində belə vətəndaşın ərzağa xərclədiyi vəsait ümumi xərclərinin 15%-ni keçmir.
Azərbayanda məhəllə meyvə-tərəvəz dükanlarından, kiçik marketlərdən, yol kənarlarından və s. alınan ərzaq məhsulları statistikaya düşmür və ya təqribi hesablanır. Onları da hesaba qatsaq, ərzaq xərclərinin payının 51,2% deyil, 60-65% olduğu anlaşılar”.
Vasif
