Son günlər Bakıda müşahidə edilən intensiv yağışlar müvafiq qurumlar tərəfindən “normadan artıq yağan yağış” kimi qiymətləndirilib. Mütəxəssislər bu cür hava hadisələrinin şəhər mühitində ciddi fəsadlara yol aça biləcəyini bildirirlər.

Bəs bir ərazi üçün yağıntının norması necə müəyyən edilir?

Sfera.az-a açıqlama verən ekoloq Rövşən Abbasovun sözlərinə görə, “norma” anlayışı son 30-40 il ərzində müəyyən ərazidə düşən yağıntının orta miqdarı əsasında müəyyən edilir.

"Məsələn, Bakı şəhərində aprel ayı üçün orta aylıq yağıntı norması təxminən 20-25 millimetr təşkil edir. Lakin bu yaxınlarda həmin miqdardan üç dəfə artıq yağıntının çox qısa müddətdə düşməsi müşahidə olunub ki, bu da artıq ekstremal hava hadisəsi sayılır", - deyən ekspert bildirdi ki, normalda bu qədər yağıntı miqdarı bütün aprel ayı ərzində düşməli idi:

"Lakin yağışlar qısa müddətdə baş verdiyi üçün bu, daha genişmiqyaslı fəsadlar törədir. Normadan artıq yağıntı dedikdə, məhz bu nəzərdə tutulur, ona hazırlıq da çox çətin olur".

O, əlavə edib ki, bu tip hadisələr elmi baxımdan “təminat əyriləri” ilə izah olunur: "Məsələn, 1-2 faizlik təminat dərəcəsi, hər 100 ildə bir və ya iki dəfə müşahidə oluna biləcək hadisəni nəzərdə tutur. Bu da ekstremal hadisə kimi qiymətləndirilir".

Ekoloq vurğulayıb ki, belə yağıntılar şəhər mühitində daha çox problem yaradır:

“Şəhərlər asfalt və digər sərt örtüklərlə örtüldüyü üçün yağış suları torpağa hopmur, nəticədə sel və daşqın riski artır. Halbuki təbii ərazilərdə meşə və torpaq sahələrində yağıntı torpağa sovrularaq təsiri azaldı”.

O, həmçinin maili ərazilərdə tikinti işlərinin məhdudlaşdırılması və həmin yerlərdə ağac əkilməsinin vacibliyini də qeyd edib: “Ağaclar yağıntının torpağa hopmasına kömək edərək sel təhlükəsinin qarşısını ala bilər”.

Bəsti Rəfizadə

Aylıq miqdarda yağıntı bir gündə düşüb: "Bu, ekstremal hava hadisəsidir"