Saytımızda dərc olunmuş "Dünyagöz” Xəstəxanasından şikayət var:” sərlövhəli yazıya qarşı tərəfin reaksiyası gəlib.

Adıçəkilən xəstəxananın direktor müavini Mahmut Hazıroğlun tərəfindən Sfera.az-ın elektron ünvanına göndərilmiş həmin cavab yazısını diqqətinizə təqdim edirik.

***

06 mart 2020-ci il tarixdə sfera.az xəbər portalında "Dünyagöz” Xəstəxanasından şikayət var:” sərlövhəli yazınızla əlaqədar ilk növbədə bildirmək istəyirik ki, yoxlanılmamış, sensasiya xarakterli yazıları internet resurslarında yerləşdirilməsinə təəssüf edirik. Bu cür yazılar "Dünya Göz” klinikasının işgüzar nüfuzuna mənfi təsir göstərir. Yazınıza cavab olaraq aşağıdakıları məlumat üçün Sizə bildiririk və ümid edirik ki, ədalət naminə cavabımızı da səhifənizdə yerləşdirərək işgüzar nüfuzumuzun zərər çəkməsinin qarşısını alacaqsınız.

Vətəndaş Əli Bağırzadə "Çağrı mərkəzi” vasitəsilə 03 mart 2020-ci il tarixdə "Dünya Göz” Klinikasına müayinəyə gəlmişdir. Vətəndaş bundan öncə digər xəstəxanada PRK üsulu ilə əməliyyat olmuşdur. Klinikada pasiyentin görmə qabiliyyəti və göz təzyiqi yoxlanılmış, göz arxası müayinə olunmuşdur. Göz yaşı quruluğunun təsbit etmək üçün "schirmer testi” həyata keçirilmiş və nəticədə pasiyentə cərrahi yolla müalicə tövsiyə edilmişdir. Bundan əlavə pasiyentə dərman resepti tərtib edilərək təqdim edilmişdir. Klinikada əməliyyatla bağlı qiymətlər və həmin qiymətlərə tətbiq edilən endirimlər barədə məlumat verilmişdir.

Nəzərinizə çatdırırıq ki, dünyanın heç bir yerində həkim müraciət edən şəxsin- pasiyentin sözlərinə əsasən diaqnoz qoymur və ya müalicə yazmır. Göz yaşı quruluğu şikayəti ilə müraciət edən xəstə üçün də həkim tərəfindən "schirmer testi” edilərək vəziyyətin qiymətləndirməsi və müalicəsini müəyyən etməsi olduqca təbiidir.

Bundan əlavə, müraciət edən hər bir şəxsə müayinənin dəyəri barədə məlumat belə müayinə başlamadan öncə məlumat verilir və pasiyent razılıq verdikdən sonra müayinə edilir. Öz seçimi və razılığı əsasında müayinə edildikdən pasiyentin şikayət etməsi həmin pasiyentin obyektiv olmadığını sübut edir.