Makron təcili iclas çağırdı
Fransa Prezidenti Emmanuel Makron oktyabrın 17-də baş verən iğtişaşlardan sonra təhlükəsizlik xidmətlərinin fəaliyyətini müzakirə etmək üçün Yelisey sarayında iclas keçirəcək.
Sfera.az bildirir ki, “Euronews”un məlumatına görə, ölkədə yaşayış xərclərinin bahalaşmasına qarşı keçirilən etirazlar zamanı baş verən zorakılıq və talan hadisələrindən sonra hökumət səviyyəsində böhran görüşləri intensivləşib. Oktyabrın 24-də yeni etiraz aksiyalarının keçirilməsi gözlənildiyindən təhlükəsizlik tədbirləri gücləndirilir.
İclasda baş nazir, müvafiq nazirlər və bütün kəşfiyyat xidmətlərinin nümayəndələri iştirak edəcəklər. Görüş zamanı qarşıdakı həftələr üçün təhlükəsizlik planları, mümkün risklərin əvvəlcədən müəyyənləşdirilməsi və ötən həftəsonu baş verən hadisələrin qarşısını almaq üçün görülən tədbirlər nəzərdən keçiriləcək. Makronun iclasdan sonra açıqlama verəcəyi bildirilir.
Fransa rəsmiləri kəşfiyyat xidmətlərinin etirazların miqyasını düzgün qiymətləndirmədiyini etiraf ediblər. Daxili işlər naziri Loran Nyune küçələrə təxminən 200 min nəfərin çıxacağını gözləsə də, aksiyalarda 550-800 min nəfərin iştirak etdiyi bildirilir. Oktyabrın 17-də ölkə üzrə təxminən 60 min təhlükəsizlik əməkdaşı cəlb olunsa da, etirazların kənarında baş verən vandalizm hallarının qarşısını almaq mümkün olmayıb.
Oktyabrın 24-nə planlaşdırılan aksiyalar zamanı təhlükəsizlik tədbirlərinin daha da gücləndiriləcəyi açıqlanıb. Əraziyə “Sentinelle” hərbi qüvvələrinin, eləcə də polis və jandarmın xüsusi təyinatlı bölmələrinin cəlb edilməsi nəzərdə tutulur. Daxili işlər nazirinin müavini Jan-Didye Berje təhlükəsizlik qüvvələrinin sayının əvvəlki aksiya ilə müqayisədə 20 faiz artırılacağını bildirib.
Günün ikinci yarısında isə Baş nazir Sebastyan Lekorn parlamentdə təmsil olunan siyasi qüvvələrin nümayəndələri ilə görüşəcək. Tərəflərin ictimai asayişin qorunması və polis fəaliyyətinin prinsiplərində mümkün dəyişiklikləri müzakirə edəcəyi gözlənilir.
Bununla yanaşı, 2027-ci il prezident seçkilərində iştirak etməyi planlaşdıran bəzi siyasətçilər görüşə qatılmayacaqlarını bildiriblər. Milli Birlik Partiyasının nümayəndələri Marin Le Pen və Jordan Bardella, eləcə də keçmiş baş nazir Eduar Filip görüşdə iştirak etməyəcəklər. Yaşıllar Partiyasının lideri Marin Tondelye, sosialist siyasətçi Rafael Qlük smann və Respublikaçılar Partiyasının rəhbəri Brüno Retayo isə görüşdə iştirak edəcəklərini təsdiqləyiblər.
Hökumətlə solçu “Tabe olmayan Fransa” hərəkatı arasında da qarşılıqlı ittihamlar davam edir. Hökumət hərəkatı etirazçıların qəzəbini alovlandırmaqda ittiham edir, hərəkat isə hakimiyyətin sosial tələblərə siyasi cavab vermədiyini bildirir. Hərəkatın koordinatoru Manuel Bompard görüşdə hökumətdən üzr, izahat və etirazçıların tələblərinə siyasi cavab tələb edəcəyini açıqlayıb.
Görüşlərdə Paris, Lion və Marsel şəhərlərinin merləri də iştirak edəcəklər. Onlar ötən həftəsonu baş verən hadisələrin qarşısının alınmaması ilə bağlı izahat tələb edir və həmin gün tətbiq olunan ictimai asayiş strategiyasının araşdırılması üçün müstəqil komissiyanın yaradılmasını təklif edirlər.
Fatimə
Sfera.az
