Çin şirkəti işçilərinə 26 milyon dollar bonus payladı

Çin şirkəti işçilərinə 26 milyon dollar bonus paylayıb. Belə ki, şirkət rəhbəri ümumi mənfəət olan 270 milyon yuandan 180 milyon yuanı  (təxminən 26 milyon dollar) işçilərə illik bonus ayırıb. Bu, sosial mediada gündəm mövzusuna çevrilib. Səxavətli addım internet istifadəçiləri arasında paxıllıq dalğasına səbəb olub.

 

Sfera.az xəbər verir ki, 13 Fevralda “Henan Kuangshan Crane Co., Ltd.” illik korporativ mərasimini keçirib. Tədbir zamanı 60 milyon yuandan (təxminən 8,7 milyon dollar) çox nağd pul yerindəcə işçilərə paylanıb. Tədbir üçün təxminən 7000 nəfərin yerləşə biləcəyi 800 ziyafət masası qurulub.

 

İşçilər mükafatlarını almaq üçün səhnəyə dəvət olunublar və interaktiv fəaliyyətlər zamanı onlara özləri pulları saymağa icazə verilib. İşçilər saydıqları qədər məbləği evlərinə apara biliblər.

İnternetdə yayılan videolarda işçilərin uzun masaların üzərinə qoyulmuş əskinasları saydıqları, digərlərinin isə səhnədən qucaqla nağd pul apardıqları, bəzilərinin isə pulları əllərində güclə saxladıqları görünür.

 

Axşam saatlarında şirkətin baş direktoru Cui Peijun da birbaşa səhnədən maliyyə şöbəsinə müraciət edib: 

 

"Niyə paltaryuyan maşınlar hədiyyə edirik? Qızılın qiyməti qalxıb? Əvvəlki illərdə biz boyunbağılar və üzüklər hədiyyə edirdik - nağd pul gətirin və hər kəsə daha 20.000 yuan (təxminən 2800 dollar) verin."

 

Hadisə dərhal Çin sosial mediasında ən çox müzakirə olunan mövzulardan birinə çevrilib və istifadəçilər zarafatla belə bir səxavətli şirkətə müraciət etməyə hazır olduqlarını bildiriblər.

Aynil

Aynil