Vatikan Trampa "yox" dedi

 

Vatikan ABŞ Prezidenti Donald Trampın "Sülh Şurası" təşəbbüsündə iştirak etməyəcək.

 

Sfera.az “Reuters”ə istinadən xəbər verir ki, bunu Vatikanın yüksək vəzifəli diplomatik nümayəndəsi kardinal Pietro Parolin deyib. O əlavə edib ki, böhran vəziyyətlərinin həlli səyləri Birləşmiş Millətlər Təşkilatı (BMT) tərəfindən idarə olunmalıdır:

 

“Müqəddəs Taxt-tac başqa dövlətlərin təbiətinə xas olmayan xüsusi təbiətinə görə “Sülh Şurası”nda iştirak etməyəcək. Narahatlıq doğuran məsələlərdən biri beynəlxalq səviyyədə bu böhran vəziyyətlərini idarə edənin hər şeydən əvvəl BMT olmasıdır. Bizim təkid etdiyimiz məqamlardan biri də budur".

 

Qeyd edək ki, “Sülh Şurası”nın yaradılması ABŞ Prezidenti Donald Trampın Qəzza zolağındakı münaqişəyə son qoymaq üçün təklif etdiyi planın bir hissəsi idi. Onun yaradılması yanvar ayında elan edilib.

 

“Sülh Şurası”na qoşulmaq üçün təxminən 60 dünya lideri dəvət olunub, onlardan bəziləri təsisçi üzvlərdir. Tramp Sülh Şurasının ilk sədridir. Sülh Şurasının açılış mərasimi yanvarın 22-də İsveçrənin Davos şəhərində keçirilən Dünya İqtisadi Forumunda baş tutub. Papa Leo isə yanvar ayında Şuraya qoşulmağa dəvət olunmuşdu.

 

Firuzə Əliyeva

Sfera.az