Çin qış möcüzəsi: Yarım milyard dollarlıq buz şəhəri
Çinin şimal-şərqində yerləşən Harbin şəhəri, qışda temperaturun -20°C-yə qədər enməsi ilə “Buz şəhəri” adını qazanıb. Hər ilin yanvar ayında başlayan Harbin Beynəlxalq Buz və Qar Festivalı isə şəhəri nağıl aləminə çevirir. Yarım milyard dollara başa gələn bu möhtəşəm festivalda dünyanın müxtəlif ölkələrindən gələn sənətkarların yaratdığı nəhəng buz heykəlləri nümayiş olunur. Lakin bu əzəmət cəmi iki ay davam edir.
Sfera.az xəbər verir ki, Heilongjiang əyalətinin paytaxtı Harbin sərt qışları ilə məşhurdur. Orta qış temperaturu -16,8°C olan şəhərin ən fərqli xüsusiyyəti uzun və qarla örtülü fəsilləridir. Sonqhua çayının sahilində yerləşən Harbin, Rusiyaya yaxınlığı səbəbindən tarixi boyunca güclü rus təsirinə məruz qalıb. Bu təsir memarlıqdan tutmuş mətbəxə, xüsusən də yerli restoranlarda təqdim edilən arağa qədər hər şeydə hiss olunur.
Soyuq iqlim Harbinə özünəməxsus kimlik qazandırıb. Qışda donmuş Sonqhua çayında xizək sürmək, buz qayıqlarına minmək və ya işıqlarla bəzədilmiş parıldayan buz heykəllərinə tamaşa etmək bu şəhərin təkrarsız zövqlərindəndir. Burada həyat demək olar ki, buz və qarla iç-içədir.
Festival ilk dəfə 1985-ci ildə keçirilib və o vaxtdan bəri dünyanın ən böyük qış tədbirlərindən birinə çevrilib. Tədbirin əsas hissəsi Zhaolin Parkında baş tutur — burada yüzlərlə rəssamın yaratdığı buz heykəlləri işıqlandırılaraq nəhəng bir buz sarayına çevrilir. Gündüzlər heykəllərin incə detallarını görmək mümkündürsə, axşamlar rəngarəng işıqlar Harbini nağıldan çıxmış bir şəhərə bənzədir.
Festival boyu təkcə heykəllər deyil, həm də xizək yarışları, buz rəqsi tamaşaları və beynəlxalq heykəltəraşlıq yarışları da keçirilir. Dünyanın hər yerindən gələn minlərlə turist, yalnız iki ay mövcud olan bu “buz şəhəri”ni görmək üçün Harbinə axın edir.
Bütün bu möhtəşəm tikililərin ümumi dəyəri təxminən 500 milyon dollardır. Minlərlə ton buz və qardan istifadə edilərək tikilən saraylar və nəhəng kompozisiyalar mart ayında havaların isinməsi ilə əriməyə başlayır. Hər il yenidən qurulmasına baxmayaraq, Harbin Buz və Qar Festivalı dünyanın ən sevilən qış tədbirlərindən biri olaraq qalır — çünki heç kim cəmi iki ay davam edən bu nağıl şəhərini görmək fürsətini əldən vermək istəmir.
Aynil
