Rusiyadan Ukraynaya əsgər cənazələrinin təhvil verilməsi davam edir. Rusiya Prezidenti Vladimir Putinin müşaviri və İstanbulda keçirilən birbaşa danışıqlarda Rusiya heyətinə rəhbərlik edən Vladimir Medinskiy bu barədə məlumat yayıb.

Sfera.az xəbər verir ki, Medinskiy “Telegram” kanalında verdiyi açıqlamada bildirib ki, Ukrayna tərəfinə daha 1000 rus əsgərinin cənazəsi təhvil verilib.

O qeyd edib ki, bu proses İstanbulda əldə edilən razılaşmaların davamıdır:

“İstanbul razılaşmaları çərçivəsində Ukraynaya bu gün daha 1000 əsgərin cənazəsini təhvil verdik. Qarşılığında isə 19 rus əsgərinin cənazəsini aldıq”.

Ukraynanın Savaş Əsirlərinə Münasibət üzrə Koordinasiya Mərkəzi də məsələ ilə bağlı açıqlama yayıb. Açıqlamada Rusiyadan 1000 ukraynalı hərbçi və mülki şəxsin cənazəsinin alındığı təsdiqlənib. Ölənlərin şəxsiyyətlərinin müəyyənləşdirilməsi istiqamətində işlərin qısa zamanda başlayacağı bildirilib. Həmçinin, cənazə mübadiləsi prosesində göstərdiyi dəstəyə görə Beynəlxalq Qırmızı Xaç Komitəsinə təşəkkür edilib.

Xatırladaq ki, 2 iyun tarixində İstanbulda keçirilən Rusiya-Ukrayna danışıqlarında 6 min ukraynalı əsgərin cənazəsinin təhvil verilməsi, ağır yaralı və 25 yaşdan aşağı əsirlərin dəyişdirilməsi ilə bağlı razılıq əldə olunmuşdu.

Vladimir Medinskiy iyunun 16-da verdiyi açıqlamada Ukraynaya 6060 əsgərin cənazəsinin təhvil verildiyini, qarşılığında isə 78 rus əsgərinin cənazəsinin alındığını bildirmişdi. Rusiya Prezidenti Vladimir Putin isə iyunun 19-da çıxışı zamanı əlavə 3000 əsgər cənazəsinin də təhvil verilməyə hazır olduğunu bəyan etmişdi.

Bəsti Rəfizadə
Sfera.az

Rusiya daha 1000 əsgərin cənazəsini verib