"Trampın təzyiqi müharibəni sonlandırmayacaq"- Çin rəsmisi

Pekin ABŞ-nin Rusiya əleyhinə tətbiq etdiyi sanksiyaların Ukrayna münaqişəsinin həllinə töhfə vermədiyini bəyan edib. 

Sfera.az xarici KİV-ə istinadən xəbər verir ki, Çin XİN-in rəsmi nümayəndəsi Lin Cian bildirib ki, münaqişənin yeganə həlli yolu dialoq və danışıqlardır.

Bu açıqlama, ABŞ senatoru Lindsey Grahamın Rusiya və tərəfdaşlarına qarşı 500% tarif tətbiq etməklə bağlı təklifini şərh edərkən səsləndirilib. Lin Cian qeyd edib ki, Çin istənilən qeyri-qanuni birtərəfli sanksiyaların və uzun qollu yurisdiksiyanın qəti əleyhinədir: "Tarif müharibələri və təzyiqlər problemin həllinə kömək etməyəcək. Biz inanırıq ki, dialoq və danışıqlar Ukrayna böhranını həll etməyin yeganə yoludur”.

Çin rəsmisi vurğulayıb ki, Pekin Ukrayna məsələsində həmişə aydın və birmənalı mövqe sərgiləyir.

“Ümid edirik ki, bütün tərəflər Ukrayna böhranının siyasi həlli üçün əlverişli atmosferin yaradılmasına öz töhfəsini verəcək, lazımi şərait yaradacaq və tərəfləri barışdırmaq və danışıqları asanlaşdırmaq üçün daha konstruktiv addımlar atacaq”, – deyə Lin Cian bildirib.

Xatırladaq ki, iyulun 14-də ABŞ Prezidenti Donald Tramp, 50 gün ərzində Ukrayna sazişində irəliləyiş olmadığı təqdirdə Rusiyaya qarşı yeni sanksiyalar tətbiq edəcəyini açıqlayıb. Bununla belə, Tramp Lindsey Grahamın Rusiyaya və onun tərəfdaşlarına 500% tarif tətbiq etmək təklifini “mənasız” adlandırıb.

Fidan Hacızadə
Sfera.az